हामी सबैकाे संसारन्यूज

काठमाडौं । नेपाल उद्योग वाणिज्य महासंघका अध्यक्ष चन्द्र ढकालले टालटुले नीतिले अर्थतन्त्रमा सुधार सम्भव नहुने बताएका छन् । नेपाल उद्योग वाणिज्य महासंघले बिहीबार आयोजना गरेको राष्ट्रिय आर्थिक बहस कार्यक्रमलाई सम्बोधन गर्दै अध्यक्ष ढकालले यस्तो बताएका हुन् ।

अध्यक्ष ढकालले नेपालको वर्तमान अर्थतन्त्र संवेदनशील मोडमा रहेको बताए । ‘हामीले समयमा सही नीति लिन सकेनौ । अब टालटुले नीतिले तत्काल सुधार सम्भव छैन,’ उनले भने,  ‘अहिले नेपालको अर्थतन्त्र संवेदनशील मोडमा छ । यसलाई अहिले पनि हल गरेनौं भने जोखिम गहिरिँदै जानेछ ।’

अध्यक्ष ढकालले लगानी, उत्पादन, रोजगारी, राजश्व र वृद्धिको मुख्य स्रोत निजी क्षेत्र भए पनि मौद्रिक नीतिले यो क्षेत्रलाई निराश बनाएको बताए । उनले सरकारी ढिलासुस्तीले गर्दा पनि नेपालमा आशा गरेजस्तो वैदेशिक लगानी भित्रिन नसकेको समेत बताए ।