हामी सबैकाे संसारन्यूज

काठमाडौँ । प्रधानमन्त्री पुष्पकमल दाहाल प्रचण्डले जनयुद्धकलामा आफ्नो जीवन सरल रहेको बताएका छन् । उनले जनयुद्धको आफ्नो जीवन सरल भए पनि अहिलेको भन्दा सक्रियता नभएको उल्लेख गरे ।

राष्ट्रिय बुद्धिजीवी सङ्गठनको छैटौँ राष्ट्रिय सम्मेलनलाई सम्बोधन गर्दै प्रधानमन्त्री प्रचण्डले आफू जीवनको उत्तरार्द्ध लागे पनि रात दिन सक्रिय भएको बताए । ‘जीवनको उत्तरार्द्धमा छु । तपाईँहरूले देख्नु भएको छ म जनयुद्धमा जस्तो खटेकै छैन । अझ बढी खटेको छु,’ प्रधानमन्त्री प्रचण्डले भने, ‘बरु जनयुद्धमा मेरो जीवन सरल थियो ।’

अहिलेका नेताहरू मध्ये पारिवारिक रूपमा सबैभन्दा अप्ठ्यारो परिस्थिति पनि आफूले नै झेलेको भन्दै उनले सक्रियता नछोडेको बताए । उनले बुद्धिजीवीहरूलाई प्रश्न गरे, ‘म आफूलाई अन्तिम समयसम्म सक्रिय राख्ने कोसिसमा छु, तपाईँहरू किन सक्नुहुन्न ?’

जनयुद्ध, जनआन्दोलनका उपलब्धि रक्षा गर्दै देशलाई समाजवादको बाटोमा डोराउन आफू सक्रिय रहेको प्रचण्डले बताए । त्यसका लागि काँग्रेस, एमाले सहितका दललाई मिलाउन संयोजनकारी भूमिका खेलेको उनको भनाइ छ ।