हामी सबैकाे संसारन्यूज

शम्भु गजुरेल, नुवाकोट

धर्ती पावन व्यासको चरणको माटो झरेको स्थल
कैलासेश्वरले छरी पियुषले पार्छन् धरा निर्मल ।
मर्स्याङ्दी नदीले सुशोभित सदा रम्घा चुँदी गाउँमा
छोरा पण्डितका पदार्पण भए श्री भानुको नाउँमा ।।१

पढ्दै संस्कृतका ऋचा बिदुर झैँ प्रकाण्ड ज्ञानी बने
घाँसीले श्रमले कुवा खनिदिँदा संकल्प गर्दा भए ।
आँसीको भरमा अनन्त जिउँने सोच्दैछ घाँसी भने
मैले गर्नु छ काम उज्ज्वल सधैं आकाशमा चम्किँने ।।२

यस्तै तर्क वितर्कका भुमरीमा गोता लगाए जब
लेखे पुण्य र ओजिलो रघुकथा नेपालको गौरव ।
गीता ज्ञान सँगै पुराण महिमा माहात्म्य पारायण
घन्क्यो मन्दिरमा सगर्व सुरिलो उत्कृष्ट रामायण ।।३

हुन् प्रश्नोत्तरका पिता अमर छन् हुन् भक्तमाला पिता
भाषा रत्न महान आदिकवि हुन् साहित्यका संहिता ।
झर्रा पद्य बिधा गुथेर लयमा रच्ने उनै भानु हुन्
बाँझो छन्द सुकाव्यमा सघनता थप्ने उनै भानु हुन्।। ४

त्यो वाल्मीकि कथा मथेर घिउ झैँ स्वादिष्ट पार्ने कवि
नेपाली पनको अपुर्ब रचना रच्ने उनै हुन् कवि ।
छोड्या छन् उपहारमा अमृत झैँ गाथा उनै रामका
भाषाका रवि भानुका चरणमा लाखौं छ है बन्दना।। ५

छन्द : शार्दूलविक्रीडित
गण : म स ज स त त गु
सङ्केत :SSS  llS  lSl  llS  SSl  SSl  S