हामी सबैकाे संसारन्यूज

भूपाल अधिकारी, बिराटनगर

मूर्ख छ स्वाँठ छ बन्दछ भेडो
गर्दछ बिल्कुल खेल अनौठो ।
कोमल फूल र तोड्छ बगान
दुर्जन बाँदर एक समान ।। १

चल्दछ यावत काम बिगारी
सुन्दर जीवन मार्ग उजाडी ।
भूत पिशाच र स्वेत मसान
दुर्जन बाँदर एक समान ।। २

बन्दछ वैद्य र बन्दछ धामी
दुच्छर बोल्दछ थर्रर कामी ।
गन्थन मन्थन गर्छ रटान
दुर्जन बाँदर एक समान ।। ३

मानव तस्कर जाल फिँजाई
चल्दछ दानव झुन्ड बनाई ।
पुग्न कहाँ तक गर्छ उडान
दुर्जन बाँदर एक समान ।। ४

मन्दिर मस्जिद मण्डप तोड्ने
आखिर नाक र खप्पर फोड्ने ।
इज्जत बर्कत बेच्छ इमान
दुर्जन बाँदर एक समान ।। ५

छन्द : दोधक
गण : भ भ भ गु गु
सङ्केत : Sll  Sll  Sll  S  S
अभ्यास : परिश्रमी पाठशाला