हामी सबैकाे संसारन्यूज

काठमाडौँ, ३ जेठ । काठमाडौको कागेश्वरी मनोहरा नगरपालिकाको प्रमुख र उपप्रमुख पदमा नेपाली काँग्रेसले अग्रता लिएको छ ।
नगरपालिकाको वडा नं एकको मतगणना सकिँदा वडा अध्यक्ष र सदस्यमा नेकपा (एमाले) ले जितेको छ । वडाको पदाधिकारी एमाले जित्दा पनि प्रमुख र उपप्रमुखमा काँग्रेस अगाडि रहेको नगर निर्वाचन अधिकृतको कार्यालयले जनाएको छ ।

काँग्रेसका प्रमुख उम्मेदवार उपेन्द्र कार्कीले एक हजार २८४, एमालेका कृष्णहरि थापाले एक हजार ९४, नेकपा (माओवादी केन्द्र) का महेश्वर फुयाँलले ६९३ र राष्ट्रिय प्रजातन्त्र पार्टीका शम्भु थापाले ७६ मत प्राप्त गर्नुभएको छ ।

यसैगरी उपप्रमुखमा काँग्रेसकी अनिता अधिकारीले एक हजार ३४६, एमालेकी विन्दु सिम्खडाले एक हजार १८५, माओवादीकी रुकु रणपालले ५१९ र राप्रपाकी कुस्मा नगरकोटीले ८८ मत पाउनुभएको छ ।

वडा नं एकका अध्यक्षमा एमालेका मुकुन्द गजुरेलले एक हजार सात मत ल्याई विजयी हुनुभएको छ । उहाँका निकटतम प्रतिद्वन्दी काँग्रेसका श्रीकृष्ण थापाले ९६७ मत ल्याउनुभयो । यसैगरी सदस्यमा पनि एमालेको समूहले जितेको छ । विजयी हुनुभएका सदस्यमा दलबहादुर तामाङ, बलराम खड्का, महिलामा रमा ढकाल र दलित महिलामा कविता सुनार हुनुहुन्छ ।

यसैगरी नागार्जुन नगरपालिकाको प्रमुखमा नेपाली काँग्रेसका मोहनबहादुर बस्नेतले अग्रता कायम राख्नुभएको छ । बस्नेतले दुई हजार ४०३ मत प्राप्त गर्नुभएको छ भने नेकपा –एमालेका कृष्णहरि खत्रीले दुई हजार ६३ मत प्राप्त गर्नुभएको निर्वाचन अधिकृत सुर्दशन लामिछानले जानकारी गराउनुभयो ।

यसैगरी राष्ट्रिय प्रजातन्त्र पार्टीका उद्धव थापाले एक हजार २२० मत, नेकपा (माओवादी केन्द्र)का कुमार तामाङले ७६७ मत प्राप्त गर्नुभएको छ । यसैगरी उपप्रमुखमा काँग्रेसका कल्याणी खड्काले दुई हजार १३९, एमालेका सुशीला अधिकारीले दुई हजार ३१८ र (माओवादी केन्द्र)का उपप्रमुख कमार तामाङले ७३१ मत प्राप्त गर्नुभएको छ ।

कीर्तिपुर नगरपालिकामा कुल १० वटा वडा कायम गरिएको छ । सो नगरपालिका प्रमुख पदमा नेकपा एमालेका रमेश महर्जनले एक हजार ७५१ मतका प्राप्त गरी अग्रस्थानमा हुनुहुन्छ ।

सोही पदमा नेपाली काँग्रेसका उम्मेदवार राजकुमार नकर्मी एकहजार ५९३ मतका साथ दोस्रो स्थानमा हुनुहुन्छ । नेकपा (माओवादी केन्द्र)का उम्मेदवार हिराबहादुर महर्जन ८०५ मतका साथ तेस्रो स्थानमा हुनुहुन्छ ।
उपप्रमुख पदमा नेकपा एमालेका उम्मेदवार सरस्वती खडका एक हजार ७०१ मतका साथ पहिलो स्थानमा, नेपाली काँग्रेसका विमला विष्ट एक हजार ४२८ मतका साथ दोस्रो तथा नेकपा (माओवादी केन्द्र)का सुशीला बस्नेत ७४९ मतका साथ तेस्रो स्थानमा हुनुहुन्छ ।

कुल मतदाता २८ हजार १०३ रहेको कीर्तिपुर नगरपालिकामा २३ हजार ६३३ मत खसेको थियो । जम्मा ५२ पदका लागि भएको निर्वाचनमा २६४ जना उम्मेदवारको प्रतिस्पर्धा छ ।

चन्द्रागिरि नगरपालिका प्रमुखको मतगणनामा हालसम्म नेपाली काँग्रेसका घनश्याम गिरीले चार हजार ८५२ मत प्राप्त गरी अग्रता कायम गर्नुभएको छ ।

उहाँका निकटतम प्रतिद्वन्द्वी नेकपा (एमाले) का प्रल्हाद कार्कीले दुई हजार ३७८ मत प्राप्त गर्नुभएको छ । हालसम्म उपप्रमुखमा काँग्रेसका इन्द्रावती श्रेष्ठले तीन हजार ७१८, एमालेका लीसा नकर्मीले दुई हजार ९२२ मत प्राप्त गर्नुभएको निर्वाचन अधिकृत गणेश नायकले जानकारी दिनुभयो ।

कुल ३८ हजार ८७२ मतदाता रहेको सो नगरपालिकामा ३१ हजार ९२० मत खसेको थियो । नगरपालिकामा १५ वडा रहेकामा अहिले ४ र ५ वडाको मतगणना सम्पन्न भइसकेको छ ।

त्यस्तै दक्षिणकाली नगरपालिकाको प्रमुखमा नेकपा (एमाले)का शशी शर्माले ३४२२ मत प्राप्त गरी अग्रता लिइरहनुभएको छ भने उहाँलाई नेपाली काँग्रेसका मोहन बस्नेतले ३१५८ मत प्राप्त गरी पछ्याइरहनुभएको छ । नेकपा (माओवादी केन्द्र) का सञ्जीव लामा १५२४ मत प्राप्त गरी तेस्रो स्थानमा रहनुभएको निर्वाचन अधिकृत प्रतिमा भट्टराई पोखरेलले जानकारी दिनुभयो ।

दक्षिणकाली नगरपालिकाको उपप्रमुखमा पनि एमालेका मीरा महर्जनले ३४७६, काँग्रेसका उम्मेदवार वसन्ती तामाङले ३२१६ र नेकपा (माओवादी केन्द्र)का कमला शर्माले ११६२ मत प्राप्त गर्नुभएको उहाँले बताउनुभयो ।

दक्षिणकाली नगरपालिकाको हालसम्मको सम्पन्न भएको वडाको मतगणनाअुनसार वडा नं– १ मा एमालेका जय थापामगर, दुईमा काँग्रेसका रामचन्द्र क्षेत्री, ३ मा एमालेको नानीबाबु महर्जन, वडा नं– ४ मा काँग्रेसका पुष्कर खड्का, ५ मा काँग्रेसका श्यामबहादुर खत्री र ६ मा एमालेका शङ्करमान महर्जन विजयी हुनुभएको छ ।