चितवन । चितवनको भरतपुर अस्पतालमा पाठेघर उपचारका क्रममा एक महिलाको मृत्यु भएको छ ।
चितवनको गैँडाकोट नगरपालिका-५ की ३९ वर्षीय सम्झना काफ्ले ढकालको पाठेघरमा पलाएको मासु (सिष्ट) निकाल्न बेहोस बनाउँदा मृत्यु भएको हो ।
ढकाललाई मङ्गलवार बायोप्सी गर्ने क्रममा कम्मरभन्दा तलको भाग लट्ठ्याउने औषधि दिइएकोमा उनको मृत्यु भएको भरतपुर अस्पताल प्रशासनले जनाएको छ ।
जिल्ला प्रहरी कार्यालय चितवनले ती महिला पहिल्यैदेखि मुटुरोगी रहेकाले उपचारका क्रममा मृत्यु भएको दाबी गरेको छ । ढकालको अवस्था गम्भीर भएपछि थप उपचारका लागि आइसियुमा सारिएको जिल्ला प्रहरी कार्यालय चितवनका सूचना अधिकारी डिएसपी भेषराज रिजालले जनाए । उनले आइसियुमा सारिएको केही बेरमा उनको मृत्यु भएको भन्ने जानकारी अस्पताल प्रशासनले दिएको बताए ।
मृतकको आफन्तले भने अस्पतालले लापरबाही गरेको आरोप लगाएका छन् । मङ्गलवार दिउँसो अस्पताल भर्ना गरिएकी ढकालको राति १० बजेतिर मृत्यु भएको थियो । मृतकका आफन्तहरूले अस्पतालले उपचारमा गम्भीर लापरबाही गरेको जिकिर गरेका छन् । मृतक महिलाका एक छोरी र एक छोरा छन् ।
वि.सं.२०८१ भदौ ५ बुधवार ११:४० मा प्रकाशित
