हामी सबैकाे संसारन्यूज

कल्पना भट्टराई, टोखा, काठमाडौं

तनमा मनमा शिव साथ धरूँ ,
जपले तपले शिव भक्ति गरूँ ।
शिव तत्त्व बुझे मन शान्त हुने ,
शिव हुन् सब ताप र पाप धुने ।१।

दिनरात परूँ शिवको शरण ,
नित पूज्न सकूँ शिवकै चरण ।
भय दूर हुने प्रभु चिन्तनले ,
जग तप्त छ यो भव बन्धनले ।२।

त्रिपुरारि उने मदनारि उनै ,
नटराज उनै र सुरेश उनै।
जगदीश उनै गणनाथ उनै ,
गिरिराज उनै भवनाथ उनै ।३।

महिमा छ अगा–ध सदा शिवको ,
शशिशेखर रम्य दिगम्बरको ।
न पुराण सके न त वेद सके ,
नबुझेर रहस्य सुरेन्द्र झुके ।४।

विषपान ग–र्यौ शुभ मङ्गल भो ,
प्रभुको महिमा छ अपार विभो !
छ निवास प्रभो हिम– आलयमा ,
शिर झुक्छ सदा प्रभुका पदमा ।५।

गणनाथ पिता ! शिवको जय होस् ,
मनुबंश सदैव निरामय होस्।
सुख–शान्ति मिलोस् शुभ होस् सदन ,
गिरिजापति शंकरमा नमन ।६।

छन्द : तोटक
गण :स स स स
गण सङ्केत : llS llS llS