हामी सबैकाे संसारन्यूज

काठमाडौँ । किर्ते मुद्दामा पक्राउ परेका लुम्बिनीका प्रदेश सभा सदस्य धनबहादुर केसी डिबी रिहाइ भएका छन् । उनलाई ३३ वर्ष पुरानो मुद्दामा दोषी ठहर भई अदालतले जेल चलान गर्न आदेश दिएको थियो ।

अदालतले उनलाई फौजदारी अपराध संहिता २०७४को सुविधा अनुसार एक वर्षसम्म कैद सजाय तोकिएका व्यक्तिले रकम जम्मा गरेमा जेल सजाय भोग्नु नपर्ने प्रावधान बमोजिम एक लाख नौ हजार दुई सय रुपैयाँ बुझाएर रिहा भएका हुन् ।

श्रीमतीसँगको अंश मुद्दामा किर्ते गरेको अभियोगमा साबिक रुकुम जिल्ला अदालतले उनलाई वि.स २०४८ साल असार ९ गते दोषी ठहर गरेको थियो । एक वर्ष जेल सजाय र दुई हजार जरिवाना तोकिएका सांसद केसीले आइतबार रुकुम पूर्व जिल्ला अदालतमा उपस्थित भएका थिए ।

अदालतबाट दोषी ठहर भएका केसीलाई आइतबार नै कारागार चलान गर्न भनिएको थियो । तर पूर्व रुकुममा कारागार नभएकाले उनलाई रुकुम पश्चिमको कारागारमा पठाइएको थियो । कारागार स्रोतका अनुसार प्रहरीले भने सांसद केसीलाई कारागारमा नै राखेन ।