काठमाडौँ । सत्तारुढ दलहरुले उपसभामुख इन्दिरा रानामगरलाई पदबाट हटाउने तयारी भएको छ । सत्तारुढ दलले उनलाई आचरण विपरीत कार्य गरेको भन्दै पदबाट हटाउने प्रस्ताव लैजाने निर्णय गरेका हुन् ।
प्रधानमन्त्री निवास बालुवाटारमा सोमबार बसेको सत्ता गठबन्धन दलको बैठकमा रानाले आचरण विपरीतको काम गरेको भन्दै हटाउनुपर्ने प्रस्ताव आएको बैठकमा सहभागी एक नेताले बताए । ‘उहाँलाई आचरण विपरीतको काम गरेको भनेर प्रस्ताव ल्याउने कुरा भएको छ ।’ उनले भने ।
राष्ट्रिय स्वतन्त्र पार्टी (रास्वपा)बाट निर्वाचित राना पछिल्लो समय अमेरिकी भिसाका लागि अनधिकृत व्यक्तिलाई सिफारिस गरेको भन्दै विवादमा परेकी थिइन् । यसैलाई आधार बनाएर आचरण विपरीतको प्रस्ताव ल्याउन लागिएको हो ।
प्रधानमन्त्री केपी शर्मा ओलीले बैठकमा संवैधानिक परिषद्लाई सत्ता गठबन्धन अनुकूल बनाउन रानालाई हटाउनुपर्ने बैठकमा बताएका थिए । प्रस्तावका लागि नेकपा एमाले र नेपाली कांग्रेसका प्रमुख सचेतकलाई भनिएको छ ।
वि.सं.२०८१ भदौ २५ मंगलवार १३:२९ मा प्रकाशित
