Sansar News
महोत्तरी । महोत्तरीको पिपरामा आगोले जलाएर हत्या गरेको अवस्थामा एक युवतीको शव फेला परेको छ । भारतसँग सीमा जोडिएको पिपरा गाउँपालिका-७, दनौलीमा अनुहार जलाइएको अवस्थामा झण्डै २५ वर्षीया युवतीको शव फेला परेको जिल्ला प्रहरी कार्यालय महोत्तरीले जनाएको छ ।
सोमबार दिउँसै शव फेला परेपनि अहिलेसम्म सनाखत हुन सकेको छैन । दनौली चौरीमा स्थानीय अशोक ठाकुरको आँप बगैँचामा अनुहार जलेको अवस्थामा शव देखेपछि स्थानीयले प्रहरीलाई खबर गरेका थिए ।
कालो लेहँगा र हल्का पहेँलो रङको कुर्था लगाएकी युवतीको शव आँप बगैँचाको आलीमा भेटिएको थियो । अनुहारमाथि सल राखेर जलाइएको छ । तर, शरीरको अन्य भागमा भने कुनै चोटपटक देखिएको छैन । अनुहार पनि पूरै जलेको छैन ।
शव पोस्टमार्टमका लागि शव प्रादेशिक अस्पताल जलेश्वरमा राखिएको छ । युवतीको हत्या भएको आशंका प्रहरीले गरेको छ । तर, घटनामा संलग्न भएको आरोपमा कोहीपनि पक्राउ परेका छैनन् ।
वि.सं.२०८१ कात्तिक १३ मंगलवार ११:३५ मा प्रकाशित
