हामी सबैकाे संसारन्यूज

काठमाडौं  : राष्ट्रपति रामचन्द्र पौडेलले तिहारजस्ता चाडपर्वले विभिन्न जातजाति, भाषाभाषी र संस्कृतिलाई एकतामा बाँधेको बताएका छन् ।

तिहारका अवसरमा शुभकामना व्यक्त गर्दै उनले नेपालमा मनाइने विभिन्न चाडपर्वले विविधतालाई एकतामा बाँध्ने कार्य गर्दै आएको धारणा राखेका छन् ।

‘यस्ता पर्वहरू मध्ये दशैँ तिहार हिन्दुहरूको महान् चाड पनि हो। यी चाडहरूले विभिन्न जातजाति, भाषाभाषी र संस्कृतिलाई एकतामा बाँध्ने गरेको छ’, उनको शुभकामना सन्देशमा उल्लेख छ ।

उनले पौराणिक, व्यावहारिक, साँस्कृतिक, मनोवैज्ञानिक एवं वैज्ञानिक महत्त्व बोकेको तिहार उज्यालो र प्रकाशको पर्व पनि भएको बताएका छन्। ‘उज्यालो आफैँमा प्रेरणाको विम्ब हो। तिहारका माध्यमबाट प्रकट हुने मानवीय उज्यालोले हाम्रो जीवनमा प्रकाश छरी हामी सबैलाई सत्य र न्यायको मार्गमा अग्रसर रहन प्रेरित गरोस्’, उनले भनेका छन् ।