हामी सबैकाे संसारन्यूज

दाहाल कल्पना,रातोपुल, काठमाडौँ

१.
सकेसम्म पुगेँ लमतन्न परेँ लम्पसार परेँ सरेँ
हातमात्रै होइन दिमागको प्रयोग लगातार गरेँ
लपक्क टाँसिएँ छपक्क भिजेँ गोडा मोल्दा
झिसमिसेमा सबैको झटारो मारामार परेँ ।

२.
हजुरबाको ढ्याक पैसा नासो कालो बाकसमा
मौका हेरी भेनासालो राख्थे चासो बाकसमा
कर्तव्यले सन्तानको, सन्ततिको सुन्दर जीवन
छ्याल्लब्याल्ल भयो आयो आफैँ रातो बाकसमा ।

३.
यही शिर स्वर्ग, संसार, छत ओहो ! प्यारो
खोसाखोस गर्दागर्दै अहिले त्यही तगारो
अन्ध स्वार्थ घमण्डले बुद्धिविवेक तुहिएपछि
थेगेन ममताले त्यही आमा भयो पसारो ।
४.
नियम विरुद्ध त अब कतै जाने छैन
जहाँ पनि किरिया कसम अब खाने छैन
भर लाग्दैन अचेल तिम्रो वाचा अठोटको
के बोल्दैछौ कहीँ कतै केही माने छैन ।

५.
काम ठिक छैन थाहा पाउँछु गर्न थाल्छु धर्म
भलो गर्न जान्या छैन गर्छु केवल चुस्ने कर्म
मीठो मुस्कान बोलीसँगै कन्तुर भर्छु आफ्नो
कोही मरून् जिउन् डुबुन् मलाई खै त शर्म ??