हामी सबैकाे संसारन्यूज

गणेश लोहनी,चितवन, हाल काठमाण्डौ

१
दलका लागि व्यापारीले थैली फुका’छन् भन्दैछन्
स्विजल्र्याण्डमा ककस्ले के के लुका’छन् भन्दैछन्
देख्या नदेख्यै सुन्या नसुन्यै गर्नुमै कल्याण छ आफ्नो
भियतनाममा नेपालीले बिस्कुन सुका’छन् भन्दैछन् ।

२
जगेर्ना गर्न योग्य चौतारी उखेलेर फालिदिन्छन्
परमपूज्यका शालिक बलजफती ढालिदिन्छन्
इमान स्वाभिमानका बैरी स्वनामधन्य मान्छेहरू
मानसम्मानका योग्यलाई मनपरि गाली दिन्छन् ।

३
अनेक निहूँमा सुसम्बन्ध फोर्दै फोर्दै हिँड्छन्
युद्ध भड्काउने अगुल्टा जोर्दै जोर्दै हिँड्छन्
निर्धा निमुखा शान्ति पाठ गरी रहौं मरी रहौं
महाशक्ति बारुदमा सलाई कोर्दै हिँड्छन् ।

४
गुणकारी खाद्य बस्तु ढुटो भन्छौ फाल्छौ
श्रीखण्ड नै दिँदा पनि ठुटो भन्छौ फाल्छौ
आकाश थाम्ने हुटिट्याउँ तिम्रो इष्र्या गर्छ
बटबृक्ष तुल्याउँदा’नि बुटो भन्छौ फाल्छौ ।

५
आफ्नो इच्छा पूरा गर्न अरूलाई मार्नेहरू
बेकसुरलाई जबर्जस्ती भुँवरीमा पार्नेहरू
माया मान सम्मान बास कता पाउलान् खै
पैत्रिक बस्ती उजाडेर विदेशमा सार्नेहरू ।