हामी सबैकाे संसारन्यूज

पाटन (ललितपुर) । एक व्यक्तिले मागेको सूचनाले पनि सुशासन प्रवद्र्धनमा सहयोग पुग्ने सरोकारवालाले बताएका छन् ।

सूचनाको हकका लागि राष्ट्रिय महासङ्घ ललितपुर शाखाको तदर्थ समिति गठनका लागि आज भएको भेलामा बोल्दै सरोकारवालाले पारदर्शिता र जवाफदेहिताको कसीमा एक व्यक्तिले माग्ने सूचना पनि महत्त्वपूर्ण हुने बताएका हुन् ।

सूचनाको हकका लागि महासङ्घका अध्यक्ष उमिदप्रसाद बागचन्दले प्रमाणमा आधारित पत्रकारिताका लागि सूचनाको हक अत्यन्तै महत्त्वपूर्ण भएको बताए । “सूचनाको हकले राज्यलाई नागरिकप्रति जवाफदेही र जिम्मेवार बनाउन भूमिका खेल्छ, कानुन कार्यान्वयनले गतल प्रवृत्तिको अन्त्य हुन्छ, बदमासी हुनबाट रोक्न सकिन्छ, देशभर हाम्रो अभियान रहन्छ, सूचना आयोगसँग समन्वय र सहकार्य निरन्तर चल्छ”, उनले भने ।

महासङ्घका वरिष्ठ उपाध्यक्ष ताराबहादुर भण्डारीले राज्यका जिम्मेवार पदाधिकारी नै सूचनाको हकलाई खुम्च्याउन लागिपरेको आरोप लगाए । उनले सार्वजनिक निकायले स्ततः प्रकाशन गर्नुपर्ने २० प्रकारका सूचना कतिपय निकायले प्रकाशन नगरेको बताए ।

महासङ्घका सचिव पूर्णप्रसाद मिश्रले सूचना मागको निवेदन पुनरावेदन गर्नसमेत समस्या भएको उल्लेख गर्दै निरन्तर दबाब अभियानका माध्यमबाट सूचनाको हक कार्यान्वयनमा सहयोग गर्न आग्रह गरे ।

भेलाले माधवप्रसाद घिमिरेको अध्यक्षतामा ललितपुर शाखाको तदर्थ समिति गठन गरेको छ । समितिको उपाध्यक्षमा रवीन्द्रराज ताम्राकार, सचिवमा सुनिल महर्जन, कोषाध्यक्षमा हरिहर थापा सदस्यमा सन्तोष बञ्जारा र सौगात मिश्र चयन भएका छन् ।