Sansar News
स्याङ्जा । स्याङ्जाको कालीगण्डकी गाउँपालिका कार्यसम्पादन मूल्याङ्कनको आधारमा गण्डकी प्रदेशमै पहिलो भएको छ ।
गण्डकी प्रदेशका ८५ स्थानीय तह मध्ये जिल्लाका तीन वटा गाउँपालिका पहिलो, दोस्रो र तेस्रो भएका छन् ।
राष्ट्रिय प्राकृतिक श्रोत तथा वित्त आयोगले गरेको कार्य सम्पादन कार्य विधि २०७८ दफा ८ को अधीनमा रही कार्य सम्पादनको आधारमा मूल्याङ्कन गरी अङ्क प्रदान गर्दा स्याङ्जाको कालीगण्डकी गाउँपालिका ७८.२ प्रतिशत अङ्क सहित गण्डकी प्रदेशकै पहिलो पालिका बनेको छ ।
आँधीखोला गाउँपालिका ७८ प्रतिशत अङ्क प्राप्त गर्दै दोस्रो र फेदिखोला गाउँपालिका ७७.९ अङ्क प्राप्त गर्दै तेस्रो भएका हुन् । यी तिन वटै गाउँपालिकामा नेकपा एमालेबाट जितेका अध्यक्ष छन् । कालीगण्डकीमा खिम थापा, आँधीखोलामा विश्व पौडेल र फेदिखोलामा घनश्याम सुवेदी अध्यक्ष हुन् ।
गण्डकी प्रदेशमै पहिलो बनेको कालीगण्डकी गाउँपालिका सात सय ५३ वटा स्थानीय तह मध्ये चौथो र आँधीखोला गाउँपालिका पाँचौँ बनेको छ ।
वि.सं.२०८१ फागुन २ शुक्रवार १५:२५ मा प्रकाशित
