हामी सबैकाे संसारन्यूज

जानुका गुरागाईँ, झापा, हाल -भक्तपुर

चिन्तन अतिशय, अनुपम गरिए
प्रेमरस मधुर, सबतिर छरिए ।
बन्दछ सुमधुर,सुललित प्रणय
बग्दछ तरलित, अविरल प्रणय ।१।

हिँड्नु छ अपगति अनुकृत नगरी
मोड्नु छ शुभ पथ विचलित नभई
मौलिक निजकृत चलनसँग मिली
छर्नु छ सबतिर खुब जतन गरी ।२।

एक दिन कुसुम अदलबदलले
फेरिन कठिन छ प्रणय गजबले ।
प्रेम त अविरल तलतल जलझैँ
बग्दछ हरपल कलकल नदझैँ ।३।

व्यर्थ छ वरपर बहकिनु त्यसरी
मिल्दछ प्रणय त हृदय तलभरि ।
प्रेमिल तनमन हर बखत झनै
बन्दछ सुमधुर नित शतदलझैँ ।४।

गर्नु छ तजबिज समय भुवनमा
भर्नु छ सुखसित प्रणय बदनमा ।
छोड्नु छ रजगज तडकभडकको
बाँच्नु छ वय अब सुखद सयलको ।५।

छन्द – चक्रपद
गण – भ न न न ल गु
सङ्केत : Sll- lll -lll -lll-l -S
विश्राम – सातौँ अक्षरमा