हामी सबैकाे संसारन्यूज

काठमाडौँ । नेपाल शिक्षक महासङ्घले फागुन २४ गतेदेखि अर्को चरणको आन्दोलन गर्ने भएको छ । फागुन २० गतेसम्म आन्दोलनका विभिन्न कार्यक्रम गर्दै आएको महासङ्घले २४ गते देशभरका शिक्षकहरूलाई काठमाडौँमा उतार्ने भएको छ ।

नेपाल शिक्षक महासङ्घसँग विगतमा भएका सबै सहमति सम्बोधन हुनेगरी अग्रगामी शिक्षा ऐन जारी गर्न दबाब दिने उद्देश्यले महासङ्घले माघ २० गतेदेखि आन्दोलन गर्दै आएको छ ।

फागुन १७ गतेसम्म पहिलो चरणको आन्दोलन अन्तर्गत स्थानीय तह, जिल्ला, प्रदेश र केन्द्र गरेर आन्दोलनका विभिन्न कार्यक्रम गरेको थियो । फागुन २४ गते देशभरका शिक्षक कर्मचारीहरूलाई माइतीघरमा उतारेर वृहत विरोध प्रदर्शन गर्ने भएको छ ।

यसअघि गत वर्षको असोजमा देशभरका शिक्षक कर्मचारीहरू काठमाडौँका सडकमा उत्रिएका थिए । सडकमै लम्पसार भएर सुतेका थिए । त्यसपछि सरकारले दुईपटक सहमति गरेको थियो । सहमति अनुसार विद्यालय शिक्षा विधेयकमा मागहरू समावेश गर्ने भनिएको थियो ।

महासंघले अहिले आएर आफूहरूसँग गरेको सहमतिलाई समावेश गरेर विद्यालय शिक्षा विधेयक तत्काल ल्याउन दबाब दिन आन्दोलन गर्न लागेको हो ।