हामी सबैकाे संसारन्यूज

काठमाडौँ । देवचुली नगरको दिर्घकालिन पर्यटन विकास गर्ने उद्देश्यका साथ देवचुली पर्यटन पदमार्ग सम्भाव्यता अध्ययन कार्यको शुरुवात भएको छ ।

काठमाडौंमा मुख्य कार्यालय रहेको स्वराज कन्सल्टेन्सी हायर गरेर पालिकाले यो अभियानलाई अगाडि बढाएको हो ।

कन्सल्टेन्टले पनि प्रकृयालाई तदारुकताका साथ सरोकारवालाहरुको सहकार्यतामा प्रोजेक्टको डिजाइन, फिल्डस्टडी लगायत लागत स्टिमेटहरु तयार गर्दैछ । यसका लागि विभिन्न चरणका अन्तरकृया तथा स्थलगत निरीक्षणका कामहरु सम्पन्न भइसकेका छन् ।

प्रोजेक्टको डिजाईन गर्दा बफर्जाेन एरीयाको हकमा वन्यजन्तु रोकथामको लागि निर्माण भइरहेको कँक्रिट वाल सहितको मेसजालीसंगसंगै झरही खोला देखि लोकाहा खोला सम्म पदमार्ग बन्नेछ । यसको नाम ग्रिनवेल्ट हुनेछ । जहाँ पदयात्राको साथसाथै साईक्लिङ्ग र बर्ड वाचिङ्ग सहितको ईको फ्रेण्डली रुट बन्नेछ ।

रुटमा मकुण्डे खोलामा र बौलाहा खोलामा २ वटा झोलुङ्गे पुल पनि निर्माण हुनेछ । आउट अफ बफर्जाेनको हकमा विभिन्न धार्मिक, ऐतिहासिक, साँस्कृतिक, पुरातात्विक महत्व र मनोरम दृश्य अवलोकन गर्न सकिने स्थानहरु देवचुली डाँडा, तिनकन्य माईको मन्दिर, किर्तिपुर मगर गाउँ लगायत विभिन्न वडाका स्थानहरुलाई जोडेर चक्रपथ बन्ने भएको छ ।
यो रुटमा केवल पदयात्रा मात्रा हुनेछ ।

लक्षित देवचुली पर्यटन पदमार्गले स्थानीय समुदायका बासिन्दाहरुमा स्वरोजगारको वातावरण सृजना गरि मानिसहरुको आयआर्जन वृद्धि गर्ने, समृद्ध देवचुलीको अपेक्षा गरिएको छ ।