हामी सबैकाे संसारन्यूज

कृष्णप्रसाद पौडेल ‘जस्ताघरे’
बालाजु, काठमाडौँ

अग्लो श्वेत हिमाल सौम्य चुचुरो, कैलाशझैँ श्रेष्ठ छ ।
नेपाली शिरमा छ ताजसरिझैँ, नेपालको सान छ ।।
रातो चन्द्र र सूर्य अङ्कित छटा, झन्डा छ क्या सुन्दर ।
उम्दा तीर्थ महेशको महल हो, नेपाल मेरो घर ।१।

हाम्रो उत्तरपट्टि चीन छ बडा, सम्पन्नको देश हो।
साथै दक्षिणपट्टि भारत सधैँ, अर्को छिमेकी छ त्यो ।।
यस्ता अब्बल देशका निकटमा, नेपाल होस् सुन्दर ।
वार्ता मेल र शान्तिको गठन हो, नेपाल मेरो घर।२।

झर्ना झर्दछ बग्छ तीव्र गतिले, झङ्कार बाजा धरी ।
बाह्रैमास सुसाउँछन् नदनदी, जागेर यात्रीसरि।।
नाच्दै गाउँछ कोइली रहरले, मैनाचरी सुन्दर ।
डाँफे राष्ट्रिय चिन्ह हो गजबको, नेपाल मेरो घर ।३।

हात्ती डुल्छ मधेस उष्ण थलमा, गैँडा छ अर्कोतिर ।
कस्तूरी मृग रम्दछन् वनवनै, खेल्छन् जरायो वर ।।
चौँरी याक हिमालका प्रमुख हुन्, हुन्छन् बडा जब्बर ।
सारा जीव समस्तका चरन हो, नेपाल मेरो घर ।४।

किल्ला पर्वत दुर्ग जङ्गल बुटी, गुम्बा र छन् मन्दिर ।
हेर्छन् आज घुमेर पर्यटकले, पाखा कुना पत्थर ।।
गुर्जो जिम्बु सयौँ इलाज रस छन्, डाँडा र कान्लातिर ।
बोझो किम्बु गुराँसका सगर हो, नेपाल मेरो घर ।५।

सानो राष्ट्र छ भव्य गौरव उँचो, सङ्घर्षमा उच्च छ ।
धेरै वर्ग र जातिको मिलनको, उद्यानझैँ रम्य छ ।
योद्धा ती बलभद्र भक्ति जनका, कस्तो ! थियो जाँगर ।
सच्चा नायक वीरका जमिन हो, नेपाल मेरो घर ।६।

भाषा संस्कृति भिन्न धर्म र कला, छन् धेर नेपालमा ।
हाम्रा मानिस वेद मुन्धुमहरू, पढ्छन् सबै साथमा ।।
साझा आश्रम हो समस्त मुनिका, छर्छन् प्रभा भास्कर ।
ज्ञानी गौतम व्यासका विपिन हो, नेपाल मेरो घर ।७।

छन्द – शार्दूलविक्रीडित
गणः म स ज स त त गु
गण सङ्केत – SSS    IIS    ISI     IIS    SSI      SSI     S