Sansar News
स्याङ्जा । स्याङ्जाको आँधीखोला गाउँपालिकाले ‘जातीय भेदभाव तथा छुवाछुत उन्मुलन राष्ट्रिय दिवस’का दिन सार्वजनिक बिदा दिने निर्णय गरेको छ ।
बुधवार अर्थात जेठ २१ गते पर्न गएको ‘जातीय भेदभाव तथा छुवाछुत उन्मुलन राष्ट्रिय दिवस’को अवसरमा गाउँपालिकाले सार्वजनिक बिदा दिने निर्णय गरेको अध्यक्ष विश्वनाथ पौडेलले बताए ।
उनले आँधीखोला निवासीलाई दिवसको अवसरमा शुभकामना दिँदै भेदभाव तथा छुवाछुत उन्मूलनमा पालिका पूर्ण प्रतिबद्ध रहेको बताए ।
पालिकामा बसोवास गर्ने दलित तथा उत्पीडित समुदायको भावनालाई आत्मसाथ गर्दै गाउँपालिकाको सोह्रौं गाउँ सभाको निर्णय अनुसार पालिका अन्तर्गतका सम्पूर्ण कार्यालयहरु, सामुदायिक एवं नीजि शैक्षिक संस्था, स्वास्थ्य संस्था (अत्यावश्यक सेवा वाहेक) र अन्य संघ संस्थाहरुमा जेठ २१ गते स्थानीय सार्वजनिक विदा दिने निर्णय भएको अध्यक्ष पौडेलको भनाइ छ ।
‘जातीय भेदभाव तथा छुवाछुत उन्मुलन राष्ट्रिय दिवस’का दिन सार्वजनिक बिदा दिने निर्णय गर्ने स्याङ्जाका पालिकाहरु मध्ये आँधीखोला पहिलो पालिका हो ।
आँधीखोला गाउँपालिकाका दलित समुदायले पालिकाले आफूहरुको भवना बुझेकोमा अध्यक्ष विश्वनाथ पौडेललाई धन्यवाद दिएका छन् । उनीहरुले जातिय छुवाछुत सम्बन्धि बनेको नियमकानून पनि अध्यक्ष पौडेलकै अग्रसरतामा कार्यन्वयन हुनेमा आसावादी भएको बताएका छन् ।
वि.सं.२०८२ जेठ २० मंगलवार ११:५६ मा प्रकाशित
