हामी सबैकाे संसारन्यूज

काठमाडौँ । सान्भि इनर्जी लिमिटेडको प्राथमिक शेयर (आईपीओ) बाँडफाँड आज हुने भएको छ । बिक्री प्रबन्धक नेपाल एसबीआई मर्चेन्टको अनुसार आज दिउँसो ३ बजे बाँडफाँड हुने भएको जनाएको हो ।

कम्पनीले जेठ ९ देखि १३ गतेसम्म सर्वसाधारणका लागि प्रतिकित्ता १०० रुपैयाँका दरमा २४ लाख १५ हजार ३०० कित्ता आईपीओ निष्काशन गरेको थियो । कुल निष्काशन रकम २४ करोड १५ लाख ३० हजार रुपैयाँ बराबरको रहेको छ । आईपीओ भने मागभन्दा साढे १० गुणा बढी आवेदन परेकाले बाँडफाँड गोलाप्रथाबाट हुने भएको हो ।

कुल २१ लाख ८ हजार २३२ आवेदकबाट २ करोड ५८ लाख ९० हजार ६२० कित्ताका लागि आवेदन परेको छ । तर, २ लाख ४१ हजार ५३० जनामात्र शेयर प्राप्त गर्ने छन् भने बाँकी १८ लाख ६६ हजार ७०२ आवेदकको हात खाली हुनेछ।

बिक्री प्रबन्धकका अनुसार बाँडफाँडपछि शेयर प्राप्त गर्नेको नाम सिडिएससीको वेवसाइट र बिक्री प्रबन्धकको पोर्टलमार्फत हेर्न सकिनेछ ।