हामी सबैकाे संसारन्यूज

ब्रासिलिया । अमेरिकी राष्ट्रपति डोनाल्ड ट्रम्पले ब्राजिलमाथि लगाएको भन्सार शुल्क वृद्धि र प्रतिबन्धको सन्दर्भमा, ब्राजिलका विभिन्न शहरहरूमा शान्तिपूर्ण विरोध प्रदर्शनहरू सुरु भएका छन्।

प्रदर्शनकारीहरूले ’संप्रभुता सम्झौताको विषय होइन’ भन्ने शान्तिपूर्ण नारासहित ब्राजिलस्थित अमेरिकी दूतावास तथा प्रमुख शहरहरूमा रहेका अमेरिकी वाणिज्य दूतावासहरू अगाडि भेला भई आफ्नो असन्तोष व्यक्त गरेका छन्। उनीहरूले भन्सारलाई राजनीतिक दबाबको उपकरणका रूपमा प्रयोग गर्दै ब्राजिलको न्यायिक स्वतन्त्रता र राष्ट्रिय स्वाधीनतामा हस्तक्षेप गरिएको आरोप लगाएका छन्।

बुधवार, अमेरिकी सरकारले ब्राजिलबाट अमेरिका निर्यात हुने वस्तुहरूमा ५० प्रतिशतसम्म भन्सार शुल्क लगाउने निर्णय सार्वजनिक गरेको थियो। यसका साथै, सर्वोच्च अदालतका न्यायाधीश अलेक्जेन्द्र डि मोराइसमाथि पनि प्रतिबन्ध लगाउने घोषणा गरिएको छ। न्यायाधीश डि मोराइस हाल पूर्व राष्ट्रपति जाएर बोल्सोनारोविरुद्धको मुद्दाको निगरानी गरिरहनु भएका छन्। उक्त मुद्दामा बोल्सोनारोमाथि सन् २०२२ को राष्ट्रपति निर्वाचनमा पराजयपछि सत्ता हात पार्न खोजेको आरोप लागेको छ।

यस निर्णयपश्चात राष्ट्रपति लुइज इनासियो लुला दा सिल्भाले अमेरिकी नीतिको स्पष्ट विरोध जनाउँदै यसलाई ब्राजिलको आन्तरिक मामिलामा अवाञ्छित हस्तक्षेपको रूपमा व्याख्या गरेका छन् उनले राष्ट्रिय हित र न्यायिक प्रक्रियाको सम्मान गर्नुपर्ने कुरामा जोड दिएका छन् ।

राष्ट्रपति लुलाले भने, “हाम्रो देशको निर्णय प्रक्रिया पूर्ण रूपमा स्वाधीन र संवैधानिक हो। ब्राजिल कुनै पनि प्रकारको बाह्य दबाब वा प्रभावमा चल्न सक्दैन। हामीले समानताको आधारमा अन्तर्राष्ट्रिय सम्बन्ध अगाडि बढाउनु आवश्यक छ।”(रासस/सिन्ह्वा)