हामी सबैकाे संसारन्यूज

काठमाडौँ । नेपाल बुद्धिजीवी सङ्गठनले नेपाली भूमि लिपुलेक हुँदै भारत र चीनबीच सीमा व्यापारका विषयमा हालै भएको सहमतिलाई अन्तर्राष्ट्रिय लज्जाको विषय भएको बताएको छ ।

संगठनका वरिष्ठ उपाध्यक्ष निलकण्ठ तिवारीद्वारा जारी विज्ञप्तिमा भनिएको छ – ‘नेपालको संविधानमा नेपालको आधिकारिक नक्सा समावेश भइसकेको, उक्त नक्सामा महाकाली नदीपूर्वका लिम्पियाधुरा, लिपुलेक र कालापानी नेपालको अभिन्न भूभाग भएको तथ्य रहेको, यसअघि नै  नेपाल सरकारले भारत सरकारलाई उक्त क्षेत्रमा सडक निर्माण तथा विस्तार, सीमा व्यापार जस्ता कुनै पनि क्रियाकलाप नगर्न आग्रह गर्दै आएको र उक्त क्षेत्र नेपाली भूभाग रहेको विषय मित्रराष्ट्र चीनलाई समेत जानकारी गराइसकिएको अवस्थामा दुई देशका बिदेशमन्त्रीबिच सीमा व्यवस्थापन बारे हालै भएको सहमति पत्रको ९ औँ बुँदामा उल्लिखित ‘लिपुलेक हुँदै भारत चीनबिच सीमा ब्यापारलाई पुन सञ्चालन गर्ने’ कुरा अन्तर्राष्ट्रिय लज्जाको विषय बन्न पुगेको छ । ’

उक्त संगठनले नेपाल, भारत र चीनबीच रहिआएको घनिष्ठ र मैत्रीपूर्ण सम्बन्धको मर्म र भावना, ऐतिहासिक सन्धि सम्झौता, तथ्य एवम् नक्सा र प्रमाणको आधारमा भएको सो सहमति कूटनीतिक माध्यमबाट समाधान आग्रहसमेत गरेको छ ।

विज्ञप्तिमा भनिएको छ ‘नेपाल, भारत र चीनबीच रहिआएको घनिष्ठ र मैत्रीपूर्ण सम्बन्धको मर्म र भावना, ऐतिहासिक सन्धि सम्झौता, तथ्य एवम् नक्सा र प्रमाणको आधारमा सो सहमति सच्याउन दुवै देशसँग यथाशिघ्र  अनुरोध गर्दै नेपाल भारत बीचको सीमा समस्या कूटनीतिक माध्यमबाट समाधान गर्न हाम्रो संगठन नेपाल सरकारको विशेष ध्यानाकर्षण गराउन चाहन्छ ।’