हामी सबैकाे संसारन्यूज

वीरगन्ज । समाजवादी प्रेस संगठन नेपाल पर्साले वीरगन्जमा मंगलबार प्रभातफेरी निकालेको छ । संगठनको चौथो स्थापना दिवसको अवसरमा वीरगन्जको घण्टाघर चोकबाट शुरु भएको प्रभातफेरी माईस्थान, महावीरस्थान, आदर्शनगर घडिअर्वा हुँदै नगर परिक्रमा गरेर पुनः घण्टाघरमा पुगी कोणसभामा परिणत भएको थियो ।

संगठनका पर्सा जिल्ला अध्यक्ष शम्भुकुमार सुमनको अध्यक्षतामा भएको कोणसभालाई सम्बोधन गर्दै नेकपा एकिकृत समाजवादी पार्टी पर्साका अध्यक्ष बालगोपाल थापाले पार्टी पत्रकारहरुको साथमा रहेको बताए ।

आफ्नो पार्टी प्रेस स्वतन्त्रताको पक्षधर रहेको बताउँदै उनले मिडिया विरोधी विद्येयक र कानुन संशोधन गर्नुपर्नेमा जोड दिए । नेपाल पत्रकार महासंघका केन्द्रिय सचिव अशोक तिवारीले पछिल्लो समय पत्रकारितामा असुरक्षा बढ्दै गएको भन्दै चिन्ता व्यक्त गरे ।

प्रेस अभिव्यक्ति स्वतन्त्रताको विरोधमा राज्यले चालेका कदमको निन्दा गर्दै उनले सरकारले ल्याउन लागेको प्रेसविरोधी विद्येयक स्वीकार्य नहुने बताए । प्रेसमाथि निरन्तर प्रहार भइरहेको बताउँदै उनले मिडियामैत्री राज्य निर्माणका लागि सबै पत्रकार एकबद्ध हुनुको विकल्प नरहेको बताए ।

कोणसभालाई सम्बोधन गर्ने वक्ताहरुले मिडियालाई दर्ता र नविकरण प्रशासन मातहतमा राख्ने प्रावधानप्रति असहमति व्यक्त गरेका थिए ।