हामी सबैकाे संसारन्यूज

देउखुरी (दाङ) – पछिल्लो समय दाङका महिलाहरू सामूहिक खेतीतर्फ आकर्षित भएका छन्। घोराही उपमहानगरपालिका–८ कटुकी सेवारस्थित जनचेतना महिला कृषक समूहले सामूहिक खेतीमार्फत उल्लेखनीय आम्दानी गर्दै आत्मनिर्भर बन्न थालेका छन्।

समूहमा २० जना महिला आवद्ध छन्। उनीहरूले वडाभित्रै २५ कट्ठा जमिन भाडामा लिएर आलु र प्याजखेतीका साथै दुईवटा टनेलमार्फत तरकारी उत्पादन गर्दै आएका छन्। कृषक समूहकी कोषाध्यक्ष वसन्ती चौधरीका अनुसार, यस वर्ष आलु र प्याज दुवैको उत्पादन राम्रो भएको छ। कृषि ज्ञान केन्द्रले लक्षित वर्गका लागि २० जनालाई रु २० हजारका दरले बीउपुँजी सहयोग गरेको छ।

समूहकी अध्यक्ष देउकुमारी चौधरीका अनुसार, आफ्नै र भाडामा लिएको जमिनमा गरिएको खेतीबाट आम्दानी समूहको कोषमा जम्मा गर्ने परिपाटी बसालिएको छ। गत वर्ष सामूहिक खेतीबाट धान, आलु, ब्रोकाउली, काउली, प्याज र गहुँ बिक्री गरी रु १ लाख १९ हजार ९५० बराबरको आम्दानी भएको समूहले जनाएको छ। हालै १५ क्विन्टल प्याज उत्पादन भएको र बिक्री भइरहेकाे बताइएको छ।

अध्यक्ष चौधरीका भनाइमा, सामूहिक खेतीले श्रम र जनशक्ति अभावका बेला काम सजिलो बनाएको छ। खेताला नपाइने समस्या घटेको छ र काम छिटो, छरितो रूपमा सम्पन्न हुने गरेको छ।

भेटेरिनरी अस्पताल तथा पशुसेवा विज्ञ केन्द्रले बङ्गुरपालनका लागि खोर निर्माणमा रु १० लाख बराबरको बजेट सहयोग गरेको छ। समूहका सदस्यहरूले वित्तीय साक्षरता सिकेर बचत, लगानी, ऋण व्यवस्थापन र खर्च योजनामा सुधार ल्याएका छन्।

पशुसेवा विज्ञ केन्द्रका सूचना अधिकारी कृष्ण न्यौपानेका अनुसार, लक्षित वर्गका महिलाको आयआर्जनमा टेवा पुर्‍याउने उद्देश्यले सहयोग उपलब्ध गराइएको हो।