हामी सबैकाे संसारन्यूज

काठमाडौं । पूर्वसभामुख कृष्णबहादुर महरालाई पुर्पक्षका लागि थुनामा पठाउने आदेशसँगै केन्द्रीय कारागार सुन्धारामा लगिएको छ।

जिल्ला अदालत काठमाडौँका सूचना अधिकारी दीपक श्रेष्ठका अनुसार न्यायाधीश हर्कबहादुर क्षेत्रीको इजलासले सुन तस्करी प्रकरणमा महराको संलग्नता देखिएको ठहर गर्दै उनलाई थुनामा पठाउने आदेश दिएको हो।

महराले चिनियाँ तस्करले भेप (विद्युतीय चुरोट)मार्फत ल्याएको करिब ९ किलो सुन भन्सारबाट छुटाउन प्रभाव प्रयोग गरेको आरोप लागेको छ। सोही प्रकरणमा उनलाई आइतबार प्रहरीले पक्राउ गरी मुद्दा दायर गरेको थियो।

अदालतले तत्काल प्राप्त प्रमाणका आधारमा महरा पनि संलग्न रहेको देखिएको बताएको छ। मुद्दामा आठ करोड ५५ लाख २८ हजार ३७४ रुपैयाँ बिगो दाबी गरिएको छ। उनका छोरा राहुल महरासहित चार जनाविरुद्ध यसअघि नै मुद्दा दर्ता भइसकेको थियो।

अघिल्लो पटक अर्को मुद्दामा पक्राउ परेका बेला महरालाई डिल्ली बजार कारागारमा राखिएको थियो। यसपटक भने उनलाई केन्द्रीय कारागार सुन्धारा अन्तर्गत जगन्नाथ देवल खण्डमा पठाइएको छ।