हामी सबैकाे संसारन्यूज

हरिभक्त सिग्देल ‘महेश’,काठमाडौँ

शिकारीले सिकार गर्छ
ऊ छुट्याउँदैन के को
सिकार गर्ने भनेर
हत्या
र हिंसामा रमेकाहरू
जीवनको मूल्य बुझ्दैनन्
लाजको धोती खुस्किसकेकाहरू
जति मच्चिएर कराए पनि
लाजको अनुभूत गर्दैनन्
बाँदरको पनि
अपमान हुन्छ
यिनीहरूसँग दाँजेमा
आज निर्वस्त्र
सार्वजनिक स्थलमा
नाङ्गो नाँच गर्नेहरू
विवेकको खडेरी परेका
समूह
चाहे कालेको होस्
वा गोरेको
हत्याहिंसा
भ्रष्टाचार
अन्याय
अत्याचार
र पक्षपातबाहेक
केही गर्न नजान्ने
मातृभूमिका सम्पूर्ण
अङ्गहरूलाई
अपाङ्ग बनाउने
एक होइन
दुई होइन
पहिले
अहिले
जहिले
जुनरूपमा
जो आए पनि
मयलपोसको
हुर्मत लिँदै छन्
मुखमा
कालोमोसो पोतिएको
मानवजीवनको
अवमूल्यन गरी
निशंस नाङ्गो नाच
कहिले
समथर तराईमा
कहिले
राजधानी सहरमा
कुहिएको आँपको संज्ञा
जीवनको मूल्य
यस्ता पटमूर्खहरू
नोटको विस्तरामा
मस्त निदाउने
मातृभूमिलाई
जुवाखाल बनाउने
हत्याहिंसा
भ्रष्टाचारमा रमाउने
त्यस्तालाई शिरमा नराखी
बस्नै नसक्ने
समाज
र समूह चल्दै नचल्ने
ठान्ने
ठानिरहने
हामी
विवेकहीन छौँ किन ?