हामी सबैकाे संसारन्यूज

कृष्णप्रसाद पौडेल ‘जस्ताघरे’
बट्टार, नुवाकोट

गरी कर्म उम्दा मिलोस् उच्च श्रद्धा ।
खुसीसाथ बाचौँ भनून् वृद्ध वृद्धा ।।
तृषा धेर पाल्दा दिगो शान्ति गुम्छ।
असन्तोष जाग्यो भने रोग बढ्छ ।।–१

असन्तुष्टिको त्यो नराम्रो छ जालो ।
दशा भोग्नुपर्ला हुँदा सोच कालो ।।
धरा मातृ माटो पुजी रम्नुपर्छ ।
असन्तोष जाग्यो भने दोष बढ्छ ।।–२

यहाँ गेह रुङ्छन् कठै बाबुआमा ।
भजून् कृष्ण राधा रमून् यो धरामा ।।
वधू पुत्र आफ्नै भला ठान्नुपर्छ ।
असन्तोष जाग्यो भने भाग्य टुट्छ ।।–३

सियाराम हाम्रा भजौँ दाहिना हुन् ।
पितादेव माता पुजौँ माथमा छन् ।।
घटी सोच तृष्णा घृणा छोड्नुपर्छ ।
असन्तोष जाग्यो भने कष्ट बढ्छ।।–४

दिएनन् बुबाले मुमाले नभन्नू ।
कठै वृद्ध वृद्धा उपेक्षा नगर्नू ।।
यिनै पाखुरीले रमौँ भन्नुपर्छ ।
असन्तोष जाग्यो भने भ्रान्ति मिल्छ ।।–५

छन्द : भुजङ्गप्रयात
गणः य य य य
सङ्केतः ISS    ISS     ISS     ISS
विश्राम :६/६ (६ र १२ अक्षर) मा