हामी सबैकाे संसारन्यूज

कविराज घिमिरे
चाँगुनारायण, भक्तपुर

मन छ चञ्चले प्याच्च बोल्दछ
चुप हुँदैन खै ! गोप्य खोल्दछ
स्थिर हुने थिएँ पाउँदा कुटी
सहनशीलता हो ठुलो बुटी ।। १

बहुत तेजका दर्द हुन् तथा
अगुण बातका छेदका कथा
सकल ती सबै मर्दछन् चुटी
सहनशीलता हो ठुलो बुटी ।। २

जति बनुन् बुरा चित्तका धनी
अनल बन्दछन् क्रोधले तिनी
जहर नै सरी हुन्छ भुट्भुटी
सहनशीलता हो ठुलो बुटी ।। ३

सहनशीलता धैर्यको जरो
सुमन बन्दछन् को हुने खरो ?
कहर मासिने वेदना फुटी
सहनशीलता हो ठुलो बुटी ।। ४

घर हुने ठुलो देव मन्दिर
चुँडिन सक्तछन् लौह जन्जिर
नगर झोकमा व्यर्थको त्रुटि
सहनशीलता हो ठुलो बुटी ।। ५

छन्द : इन्दिरा
गण : न र र ल गु
गण सङ्केत : III – SIS – SIS – I – S