हामी सबैकाे संसारन्यूज

रामशरण न्यौपाने “पाँचघरे”
चाँगुनारायण, भक्तपुर

छाती उदार होओस् अत्यन्त अग्रगामी
खुर्केर व्याधि फाल्ने आफैँ बनेर धामी
सामथ्र्यवान् सधैँ नै सत्कर्म गर्न नामी
लौ स्वच्छ दक्ष नेता राखौँ चुनेर हामी।।१

आँखातरेर हेर्ने ज्यादा भए सिकारी
नेपाल गुज्रिएको सङ्कष्टमा छ भारी
यो तत्थ्यलाई जानी ढालेर नै हरामी
लौ स्वच्छ दक्ष नेता राखौँ चुनेर हामी।।२

पूजा तथा प्रशंसा नेपाललाई गर्दै
शोभा र सिर्जनाले भण्डार पूर्ण भर्दै
निर्माणका सुनौला खाका बुनेर दामी
लौ स्वच्छ दक्ष नेता राखौँ चुनेर हामी।।३

ज्यादा उजाड पारे नेपाल देश सोसी
मैदानमा खडा छन् भाले बनेर दोषी
खुङ्खार भ्रष्टलाई डामौँ बनेर धामी
लौ स्वच्छ दक्ष नेता राखौँ चुनेर हामी।।४

नेपाल धाम पारौँ सारा बनी पुजारी
हौँ देवदूत प्यारा नेपाल स्वर्ग पारी
आस्था तथा प्रतिष्ठा जो राख्नसक्छ थामी
लौ स्वच्छ दक्ष नेता राखौँ चुनेर हामी।।५

छन्द : दिक्पाल
गण :त – र – म – ज – गु – गु
सङ्केत : SSI – SIS – SSS – ISI – S – S