हामी सबैकाे संसारन्यूज

बीके मुखिया,वाङदे
दार्जिलिङ,भारत

पण्डित हुँदैन कोही तागा लगाउँदैमा
पूजा हुँदैन साथी घण्टी बजाउँदैमा

पाखण्ड कर्म गर्दै जीवन सदा बिताए
मेटिन्न पाप हाम्रो गङ्गा नुहाउँदैमा

सेवा गरे दुखीको साक्षात् हुनेछ भगवान्
दर्शन हुँदैन हरिको खुब तीर्थ धाउँदैमा

आस्था गरेर कोही ढुङ्गाको गर्छ पूजा
बन्दैन देव ढुङ्गा दुध जल चढाउँदैमा

गीता कुरान पढ्ने मान्छे बन्यो अधर्मी
विद्वान् हुँदैन कोही पुस्तक समाउँदैमा

बहर : मुजारे मुसम्मन अखरब
अर्कान : मफ्ऊलु , फाइलातुन् , मफ्ऊलु , फाइलातुन्
वजन : २२१ – २१२२ – २२१ – २१२२
काफिया : आउँदै
तहलिली रदिफ : मा
अभ्यास : परिश्रमी पाठशाला