हामी सबैकाे संसारन्यूज

काठमाडौं । राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजक दुर्गा प्रसाईँलाई प्रहरीले आइतबार बिहान पुनः पक्राउ गरेको छ । जिल्ला प्रहरी परिसर भक्तपुरको टोलीले उनलाई भक्तपुरस्थित निवासबाटै नियन्त्रणमा लिएको जनाएको छ ।

पारिवारिक स्रोतका अनुसार बिहान करिब ६ बजेदेखि नै प्रहरी टोली निवास वरिपरि तैनाथ रहेको थियो । पौने आठ बजेतिर पक्राउ पुर्जी थमाइ उनलाई प्रहरी नियन्त्रणमा लिइएको बताइएको छ ।

प्रहरीले दिएको जानकारीअनुसार पक्राउ पुर्जीमा ‘सार्वजनिक शान्ति विरुद्धको मुद्दाको अनुसन्धानका लागि’ भन्ने व्यहोरा उल्लेख गरिएको छ । हाल उनलाई जिल्ला प्रहरी परिसर भक्तपुरमा राखी थप अनुसन्धान भइरहेको छ ।

यसअघि प्रसाईँलाई ४ फागुनमा काठमाडौंबाट पक्राउ गरिएको थियो । त्यसपछि १३ फागुनमा सर्वोच्च अदालतको आदेशबाट उनी रिहा भएका थिए । उनकी श्रीमती उमा प्रसाईँले गैरकानुनी रूपमा हिरासतमा राखिएको दाबी गर्दै बन्दी प्रत्यक्षीकरणको रिट दायर गरेकी थिइन् ।

उक्त रिटमाथि सुनुवाइ गर्दै सर्वोच्च अदालतका न्यायाधीशद्वय मनोजकुमार शर्मा र मेघराज पोखरेलको इजलासले थुनामुक्त गर्न आदेश दिएको थियो ।

पछिल्ला घटनाक्रमसँगै प्रसाईँमाथि जारी अनुसन्धान र कानुनी प्रक्रियाप्रति चासो बढेको छ । प्रहरीले अनुसन्धान जारी रहेको जनाएको छ ।