हामी सबैकाे संसारन्यूज

भक्तपुर । नयाँ वर्ष २०८३ को अवसरमा भक्तपुरमा क्यालेन्डर प्रदर्शनी आयोजना हुने भएको छ। प्रदर्शनीमा नेपालका सांस्कृतिक तथा पर्यटकीय गतिविधिहरूलाई समेटिएका कलात्मक पात्रोहरू प्रदर्शन गरिने आयोजकले जनाएको छ।

गत वर्ष २०८२ मा बैंक, विद्यालय, व्यवसायिक संस्था, राजनीतिक संगठन तथा सहकारीहरूले तीन करोडभन्दा बढी पात्रो प्रकाशन तथा वितरण गरेका थिए। यस वर्ष पनि सो संख्या बढ्ने अपेक्षा गरिएको छ। प्रदर्शनीमा विभिन्न आकर्षक तस्बिरसहितका पात्रोहरू राखिनेछन्।

आयोजकका अनुसार आन्तरिक पर्यटन प्रवर्द्धन र स्थानीय गन्तव्यहरूको प्रवर्द्धन गर्ने उद्देश्यसहित कार्यक्रम आयोजना गर्न लागिएको हो। विशेषगरी बैशाख १ गते बिस्का जात्राको अवसरमा भक्तपुर पुग्ने दर्शकलाई लक्षित गर्दै प्रकाशकहरूलाई आफ्ना पात्रोका नमूनाहरू प्रदर्शन गर्न आह्वान गरिएको छ।

प्रदर्शनीसँगै ३३ पोखरी परिक्रमा कार्यक्रम पनि सञ्चालन गरिने जनाइएको छ, जसले आगन्तुकलाई सांस्कृतिक तथा पर्यटन अनुभव प्रदान गर्ने विश्वास गरिएको छ।

यो प्रदर्शनी चैत ३०, २०८२ देखि बैशाख १, २०८३ सम्म भक्तपुरमा सञ्चालन हुने जनाइएको छ।