हामी सबैकाे संसारन्यूज

काठमाडौं । देशभर मनसुनको प्रभाव थप सक्रिय भएसँगै आज अधिकांश स्थानमा वर्षाको सम्भावना रहेको छ। जल तथा मौसम पूर्वानुमान महाशाखाका अनुसार हाल मनसुनको न्यून चापीय रेखा पश्चिममा औसत स्थानभन्दा केही उत्तरतर्फ र पूर्वमा औसत स्थानकै आसपास रहेकाले देशभर वर्षाको प्रभाव देखिएको हो।

महाशाखाका अनुसार दिउँसो हिमाली, पहाडी तथा तराईका अधिकांश क्षेत्रमा मेघगर्जन र चट्याङसहित मध्यम वर्षा हुने सम्भावना छ। उच्च हिमाली क्षेत्रमा वर्षासँगै हिमपात हुन सक्ने छ।

कोशी, लुम्बिनी र सुदूरपश्चिम प्रदेशका केही स्थान तथा बागमती र गण्डकी प्रदेशका एक–दुई स्थानमा भारीदेखि धेरै भारी वर्षा हुन सक्ने पूर्वानुमान गरिएको छ। त्यस्तै कोशी, गण्डकी, लुम्बिनी र सुदूरपश्चिम प्रदेशका केही क्षेत्रमा अति भारी वर्षा हुने सम्भावना रहेको छ।

रातिको समयमा पनि देशभर अधिकांश स्थानमा बदली रहनेछ। कोशी, गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा मेघगर्जन र चट्याङसहित वर्षा जारी रहने अनुमान गरिएको छ। कोशी र सुदूरपश्चिम प्रदेशका केही स्थानमा रातिको समयमा पनि अति भारी वर्षा हुन सक्ने भएकाले विशेष सतर्कता अपनाउन आग्रह गरिएको छ।

यसैबीच, राष्ट्रिय विपद् जोखिम न्यूनीकरण तथा व्यवस्थापन प्राधिकरणले अत्यधिक वर्षाका कारण आकस्मिक बाढी, पहिरो, डुबान, गेग्रान बहाव तथा नदी कटानको जोखिम बढ्न सक्ने भन्दै नदी किनार, पहिरो प्रभावित क्षेत्र र कमजोर बस्तीमा बसोबास गर्ने नागरिकलाई विशेष सावधानी अपनाउन आग्रह गरेको छ। प्राधिकरणले वर्षा र बाढीसम्बन्धी जानकारीका लागि ११५५, विपद्मा सहायता माग्न १२३४, नेपाल प्रहरी १०० र सशस्त्र प्रहरी बलको १११४ हटलाइन नम्बर प्रयोग गर्न आग्रह गरेको छ।