हामी सबैकाे संसारन्यूज

काठमाडौं। नेपालका लागि होन्डा कारको आधिकारिक वितरक स्याकार ट्रेडिङ कम्पनी प्रा.लि. ले ग्राहक सुरक्षालाई उच्च प्राथमिकतामा राख्दै होन्डाका केही पुराना मोडेलका गाडीका लागि निःशुल्क एयरब्याग सेफ्टी रिकलब अभियान सञ्चालन गरेको जनाएको छ।

कम्पनीका अनुसार सन् २००१ देखि २०१४ सम्म निर्माण भएका केही होन्डा गाडीमा प्रयोग गरिएको एसआरएस एयरब्याग इन्फ्लेटर (SRS Airbag Inflator) मा समयसँगै समस्या देखिन सक्ने सम्भावित जोखिमलाई मध्यनजर गर्दै उक्त अभियान सञ्चालन गरिएको हो।

रिकलब अभियानअन्तर्गत City, Civic, CR-V, Jazz, Insight, Stream र Accord लगायतका मोडेल प्रभावित हुन सक्ने जनाइएको छ। ग्राहकले आफ्नो गाडी यस अभियानअन्तर्गत पर्छ वा पर्दैन भन्ने जानकारी होन्डाको आधिकारिक वेबसाइटमार्फत वा नजिकको आधिकारिक सर्भिस सेन्टरमा सम्पर्क गरेर प्राप्त गर्न सक्नेछन्।

कम्पनीका अनुसार प्रभावित गाडीको एयरब्याग परीक्षण, आवश्यक मर्मत तथा एयरब्याग इन्फ्लेटर प्रतिस्थापन पूर्ण रूपमा निःशुल्क गरिनेछ। यसका लागि ग्राहकले कुनै पनि शुल्क तिर्नुपर्ने छैन।

सम्भावित जोखिमबाट बच्न तथा सुरक्षित यात्रा सुनिश्चित गर्न प्रभावित गाडी भएका ग्राहकलाई यथाशीघ्र नजिकको होन्डा आधिकारिक सर्भिस सेन्टरमा सम्पर्क गरी गाडीको परीक्षण गराउन कम्पनीले अनुरोध गरेको छ।

यस सम्बन्धमा थप जानकारीका लागि ग्राहकले कम्पनीले उपलब्ध गराएका सम्पर्क नम्बरमा फोन गर्न वा इमेलमार्फत सम्पर्क गर्न सक्नेछन्।