हामी सबैकाे संसारन्यूज

कविराज घिमिरे
चाँगुनारायण, भक्तपुर

बनी आफू यन्त्रैसरह जहिल्यै खट्छ जसले
फलेका काँचा ती रुख फल दिने गोड्छ जसले
चितामा बस्नेका पनि हृदय ती छाम्छ वशले
उनै ऊर्जा हाम्रा गुरुजन भजौँ प्रेमरसले ।। १

भनेनन् वर्षा यो न त धुप भने स्याँठ अथवा
लु चल्दामा खप्ने तरर पसिनासाथ अगुवा
धुलो मैलो फ्याँक्तै अमृत ढकनी खोल्छ कसले ?
उनै ऊर्जा हाम्रा गुरुजन भजौँ प्रेमरसले ।। २

निदाएकालाई बिउँतन गरे सार्थक क्रिया
भला बन्ने सोझो तरखर गरे जे छ प्रक्रिया
न छोयो अल्छीले न त घर गरेको सकसले
उनै ऊर्जा हाम्रा गुरुजन भजौँ प्रेमरसले ।। ३

बनेका मान्द्रोझै हविगत गिरेका मनुजमा
दिई शिक्षा दीक्षा हिमशिखरझैँ पुग्न नभमा
सबैलाई पढ्दै कसरत गरे यत्नसँगले
उनै ऊर्जा हाम्रा गुरुजन भजौँ प्रेमरसले ।। ४

पुऱ्याए कुर्सीमा तर अब तिनै शासक बनी
घुमाएका देख्छौँ गुरुकन मजाले फनफनी
नहोस् यस्तो सत्ता मधुर सबका यी वचनले
उनै ऊर्जा हाम्रा गुरुजन भजौँ प्रेमरसले ।। ५

छन्द : शिखरिणी
गण : य – म – न – स – भ – ल – गु
सङ्केत : ISS – SSS – III – IIS – SII – I – S