Sansar News
२७ साउन,धनगढी । जिल्ला समन्वय समिति कैलालीमा नेकपा (एमाले) र नेपाल लोकतान्त्रिक फोरमको गठबन्धन निर्विरोध निर्वाचित भएको छ ।
मुख्य निर्वाचन अधिकृत धनसिं महराले जिल्ला समन्वय समितिको अध्यक्षमा नेकपा (एमाले)का सूर्यबहादुर थापा र उपाध्यक्षमा एमालेकै सुन्दरीदेवी चौधरी निर्विरोध निर्वाचित हुनु भएको जानकारी दिनुभयो । भदौ १ गतेका लागि निर्वाचनको मिति तोकिए पनि निर्विरोध भएकाले आजै विजयी घोषणा गरिएको हो ।
यसैगरी एमालेबाट लालित साउद, टेकबहादुर बुढा, मालती सार्की, देवी भण्डारी समन्वय समितिको सदस्यमा निर्वाचित हुनुभएको छ । नौ सदस्य समन्वय समितिमा नेपाल लोकतान्त्रिक फोरमबाट विष्णु चौधरी, राजकुमार महतो र मिनादेवी चौधरी निर्वाचित हुनुभएको छ ।
जिल्ला समन्वय समितिको चयनका लागि आज मनोनयन दर्ता गर्ने कार्यतालिका रहेको थियो । एमाले र लोकतान्त्रिक फोरमको गठबन्धनको मात्र उम्मेदवारी परेपछि उहाँहरू निर्विरोध निर्वाचित हुनुभएको हो ।
तेह्रवटा स्थानीय तह रहेको कैलालीमा हालै सम्पन्न स्थानीय तह निर्वाचनमा एमाले सात, नेपाली कांग्रेस तीन, नेकपा (माओवादी केन्द्र) दुई र नेपाल लोकतान्त्रिक फोरम एक तहमा विजयी भएका थिए । रासस
वि.सं.२०७४ साउन २७ शुक्रवार १३:५० मा प्रकाशित
