हामी सबैकाे संसारन्यूज

१९ मंसिर, पाल्पा । नेकपा (एमाले)का केन्द्रीय सदस्य तथा पूर्वमन्त्री सोमप्रसाद पाण्डेयले कालीगण्डकी लिफ्ट खानेपानीमार्फत तानसेनको खानेपानीको समस्या समाधान गर्ने बताउनुभएको छ ।

कालीगण्डकी लिफ्ट योजनाबाट तानसेनवासीलाई स्वच्छ खानेपानीको प्रबन्ध मिलाउन प्रभावकारी कदम चालिने उहाँले बताउनुभयो । तानसेनमा मतदातासँग कुराकानी गर्दै पाल्पा निर्वाचन क्षेत्र २ का प्रतिनिधिसभा सदस्यका उम्मेदवार पाण्डेय लिफ्टबाट पानी ल्याएपछि वर्षौदेखिको खानेपानीको समस्या समाधान हुने बताउनुभयो ।

तानसेनमा दैनिक १० लाख लिटर पानीको अभावले धारामा नियमित पानी नआउँदा उपभोक्ता समस्यामा परेका हुन् । पाल्पाली पहिचान बनेको करुवा र ढाकाजस्ता घरेलु उद्योगलाई प्रवद्र्धन गर्ने व्यवस्था मिलाइने उहाँले बताउनुभयो । तानसेन पर्यटकीय शहरका रुपमा विकास गरी पर्यटकका लागि आकर्षणको केन्द्र बनाउने योजना रहेको बताउनुभयो ।

तानसेन, गोर्खेकोट, ठूली उकाली, सानी उकाली, राम्दी, सुनगुफा, रानीघाट, बौघागुम्हा र और्वाश्रमलाई ट्रेकिङ रुट तथा जितगढी, नुवाकोट, भकारलुङ, मोहन्दी, भैरवस्थान, तानसेनलाई ट्रेकिङ रुट निर्माण गरी हाइकिङ पर्यटन प्रवद्र्धन गर्ने कार्यसूची अघि सारेको बताउनुभयो ।