हामी सबैकाे संसारन्यूज

युनाइटेड किरात राई अर्गनाइजेसन अफ अमेरिकाले अमेरिकाको बिभिन्न राज्यहरुमा किरात राई हरुको महान चाड साकेला (उभौली) भब्य रुपमा मनाउने भएको छ ।

साकेलालाई भव्यतापुर्वक मनाउन बिभिन्न समितिहरु गठन गरिएको र उक्त समितिहरुले आ–आफ्नो तोकिएको काम सम्पन्न गरि रहेको कुरा अर्गनाइजेसनका सभापति बिष्णु राईले बताएका छन् । उनका अनुसार केन्द्रिय समितिले मेरिल्याण्ड राज्यको बाल्टिमोरमा डी एम भी पी (वाशिङ्गटन डिसी, मेरिल्याण्ड, भर्जिनिया, पेन्सिलभानिया) लोकल च्याप्टरसंग संयुक्त रुपमा साकेला मनाउने भएको छ भने लोकल च्याप्टरहरु न्युयोर्क, न्युजर्सीले क्विन्स ब्रिज पार्क न्युयोर्कमा, न्यु इंग्ल्याण्ड (म्यासाच्युसेट्स, न्यु हेम्प्शायर, कनेक्टिकट) लोकल च्याप्टरले बोस्टनमा, क्यालिफोर्निया लोकल च्याप्टरले सानफ्रान्सिस्कोमा कार्यक्रम गर्ने भएको छ ।

सल्लाहकार तथा साकेला कार्यक्रमको केन्द्रिय संयोजक मिलन राईका अनुसार कार्यक्रम मेरिल्याण्ड राज्यको बाल्टिमोर हन्ट भ्याली स्थित होटल म्यारियटको कन्भेन्सन हलमा अर्गनाइजेसनको कन्भेन्सन मे २६,२०१८ हुने र साकेला कार्यक्रम भ्याली स्टेट पार्क उडलावनमा मे २७, २०१८ मा हुने भएको छ । साकेलामा आउने पाहुनाहरुका लागि सोहि होटलमा कोठाहरु बुक गरिएको छ । प्रमुख अतिथि अमेरिका स्थित नेपाली राजदूतलाई निमन्त्रणा पठाई सकिएको कुरा उनले बताए ।

अर्गनाइजेसनका केन्द्रिय उप सभापति मुना राईका अनुसार अमेरिकामा जन्मेका वा नेपालबाट सानो उमेरमा अमेरिका आएर स्कुल कलेज पढ्ने बिद्यार्थीहरुलाई किरात मुन्धुम, साकेलाको महत्व र तीन चुलाको महत्व सम्बन्धि बिभिन्न लेख रचना वा स्पीचको लागि आव्हान गरिएको छ ।

सल्लाहकार शिब कुमार राईका अनुसार विभिन्न स्कुल तथा कलेजमा ग्राजुएसन गर्ने हरुलाई तथा अर्गनाइजेसनको संरक्षक आजीवन मानार्थ सदस्यहरुलाई प्रमाण पत्र दिइने छ ।

सल्लाहकार धौलबीर राइको अनुसार बिभिन्न राज्य देखि आएर साकेला पर्फर्मेन्स गर्ने टोली हरुलाई तयारी अवस्थामा राखिएको छ ।

न्यु इंग्ल्याण्ड च्याप्टरका अध्यक्ष मुक्ति नारायण राईका अनुसार मे १९,२०१८ बोस्टनमा हुने कार्यक्रमको लागि बोस्टन र न्यु हेम्प्शायारमा योङ्ग जेनेरेशन हरुले साकेला सिल्लीको अभ्यास गरि रहेका छन् र प्रत्येक वर्ष साकेलाको उपलक्षमा गरिने रक्तदान कार्यक्रम अमेरिकी रेडक्रसको व्यस्तताले गर्दा सेप्टेम्बरमा गरिने भएको छ ।

यसरि नै क्यालिफोर्निया लोकल च्याप्टर बाट बोर्ड मेम्बर जी एस राइका अनुसार सम्पूर्ण नेपाली संघ संगठनहरुलाई निमन्त्रणा गरिने र भब्यरुपमा जुन ९, २०१८ मा साकेला गर्ने कार्यक्रम रहेको छ ।

न्युयोर्क लोकल च्याप्टरका अध्यक्ष केशब राम राईका अनुसार न्युयोर्कमा जुन २३, २०१८ मा साकेलाको मैजारो गरिने भएको छ । उनका अनुसार नक्छुंगको ब्यबस्था भुटानी कम्युनिटीबाट गरिने छ ।
सुरेश चाम्लिङ्ग, न्यु हेम्प्शायरबाट