१२ असोज, अङ्कारा (टर्की) । टर्कीको राष्ट्रिय गुप्तचर संस्था (एमआईटी) ले इस्लाम धर्मगुरु फेतेल्लाह गुलेनको आन्दोलनसँग आवद्धता भएको आरोपमा मङ्गलबार ८७ जना गुप्तचर अधिकारीलाई पदबाट बर्खास्त गरेको यहाँको राज्य सञ्चालित अनादोलु समाचार संस्थाले जनाएको छ ।
बर्खास्त भएका ८७ जनामध्ये ५२ जना अधिकारीलाई फौजदारी अभियोग लगाइएको छ ।
गुप्तचर अधिकारीविरुद्धको कारबाही टर्कीमा जुलाई १५ मा भएको असफल कू प्रयासपछि घोषणा भएको तीन महिने सङ्कटकालका क्रममा यहाँको संवैधानिक निर्देशनअनुरूप भएको हो ।
यी सबै गुप्तचर अधिकारी भविष्यमा यहाँको सरकारी जागिरका लागि अयोग्य रहने गरी बर्खास्त भएका छन् ।
टर्की सरकारले जुलाई १५ मा भएको असफल राज्य विद्रोहमा धर्मगुरु गुलेको हात रहेको भन्दै अमेरिकासँग गुलेनलाई पक्राउ गरी कारबाहीका लागि टर्कीलाई सुपुदर्गी गर्न यसअघि नै निर्देशन दिएको छ ।
तर गुलेन र उहाँको सङ्घसंस्थाले आफूहरूको अभियान विल्कुल शान्तिपूर्ण धार्मिक अभियान रहेको बताउँदै राज्य विद्रोह गराउने आफ्नो कुनै योजना नरहेको जनाएका छन् । सिन्ह्वा
