हामी सबैकाे संसारन्यूज

१४ असोज, इस्तानबुल (टर्की) । टर्कीको दक्षिणपश्चिमी सहर बोडरममा विदेशी नागरिक चढेको एक डुङ्गा दुर्घटना हुँदा चार जनाको मृत्यु भएको र २३ जना नदीमा डुबेर बेपत्ता भउको टर्कीको राज्य सञ्चालित समाचार संस्था अनादोलु न्युज एजेन्सीले बिहीबार जनाएको छ ।

एकतीस जना आप्रवासीलाई लिएर हिँडेको डुङ्गा अत्यधिक भारका कारण डुबेपछि चार जनालाई जीवितै उद्धार गरिएको थियो भने चार जनाको मृत शरीर पानीबाट बाहिर निकालिएको छ । २३ जना अझै बेपत्ता रहेका छन् ।

डुङ्गा दुर्घटनापछि मृत अवस्थामा उद्धार गरिएका चारै जनाको शरीरमा ‘लाइफ भेस्ट’ भेटिएको छैन ।

सन् २०१५ मा भूमध्यसागरिय क्षेत्रको बाटो हुँदै युरोप जाने क्रममा भएका डुङ्गा दुर्घटना लगायतका घटनामा कम्तिमा तीन हजार ८०० जनाको ज्यान गएको थियो ।

टर्कीको बाटो हुँदै ग्रीसका विभिन्न टापुबाट युरोप पुग्ने आप्रवासीले असुरक्षित यात्रा गर्दा यस वर्ष पनि ठूलो सङ्ख्यामा ज्यान गुमाए पनि सन् २०१५को तुलनामा यो सङ्ख्या केही घटेको छ । एपी