हामी सबैकाे संसारन्यूज

अमेरिकामा रहेका समाजसेवी दम्पत्ति हेम थापा र माया थापाले साउदीको जेलमा सजाय भोगिरहेका कुमार रानाको उद्धारका लागि २ लाख सहयोग गरेका छन् ।

सडक दुर्घटनामा साउदी नागरिकलाई घाइते बनाएको मुद्दामा उनी झण्डै डेढवर्षदेखि साउदीको जेलमा रहेका छन् ।
रानालाई जेलबाट निकाल्नका लागि २ लाख ९४ हजार साउदी रियाल आवस्यक परेको हुनाले सबैलाई सहयोग गर्न कुमारकी श्रीमती अम्बिका राना मगरले बताएकी छन् । कुमारलाई जेलबाट रिहा गर्नका लागि भन्दै तेह्रथुम जिल्ला मोराहाङ ९ सिकदेम घर भइ हाल अमेरिकामा रहेका थापा दम्पत्तीले सहयोग गरेका हुन् ।

उक्त रकम विहिबार एविसी टेलिभिजनद्धारा सञ्चालित इन्द्रेणी कार्यक्रमका संचालक कृष्ण कंडेल, रानाकी श्रीमती तथा थापा दम्पत्तीका तर्फबाट छत्र लकाई खड्काले उक्त रकम हस्तान्तरण गरेको बताइएको छ ।

सोहि अवसरमा दुवै मिर्गौला फेल भएका रौतहटका नन्द किशोर यादवको उपचारका लागि पनि २० हजार र इन्द्रेणी कार्यक्रमका लागि रु १० हजार रुपैयाँ गरेर जम्मा २ लाख ३० हजार रुपैयाँ सहयोग गरिएको थापाले संसारन्युजलाई बताएका छन् । थापा दम्पत्तिले यस अघि पनि साउदीको जेलमा रहेका प्रेम कुमार राईको रिहाइका लागि ५ लाख रुपैयाँ सहयोग गरेका थिए । हाल प्रेम राई नोपल फर्किसकेका छन् ।