Sansar News
५ कात्तिक, याङ्गुन । गत शनिबार मध्य म्यानमारमा भएको एक डुङ्गा दुर्घटनामा मृत्यु हुनेको सङ्ख्या ५५ पुगेको यहाँको सञ्चारमाध्ययमले बिहीबार जनाएका छन् ।
अझै दर्जनाँै मानिस बेपत्ता भएको हुनसक्ने आशङ्कामा उद्धार कार्यलाई जारी राखिएको स्थानीय अधिकारीले जानकारी दिएका छन् ।
सो डुङ्गामा विद्यार्थी, शिक्षक र केही कामदार सवार रहेको बताइएको छ । शनिबार बिहानै भएको यस दुर्घटनाबाट १५९ व्यक्तिलाई भने उद्धार गरिएको छ । म्यानमारको मोनिवा सहरबाट ७२ किलोमिटर उत्तरमा पर्ने जलक्षेत्रमा सो दुर्घटना भएको र ज्यान गुमाउने ५५ जनामध्ये अधिकांश अर्थात् ४३ जना महिला रहेको स्थानीय प्रशासनले जनाएको छ ।
डुङ्गामा २४० देखि २५० जनासम्म सवार रहेको अनुमान गरिएको छ । सो डुङ्गामा विश्वविद्यालयका ७० देखि ८० जना विद्यार्थी, करिब ३० जना शिक्षक केही चिकित्सक र अन्य व्यक्ति रहेका थिए ।
सो दुर्घटनाबाट बाँच्न सफल भएकी छोरा र श्रीमान्लाई गुमाएकी प्रत्यक्षदर्शी एक शिक्षिकाले डुङ्गामा क्षमताभन्दा बढी यात्रु राखेकोले डुङ्गा डुबेको दाबी गरिन् ।
म्यानमारमा डुङ्गा यात्रामा सुरक्षाको कमी र क्षमताभन्दा बढी यात्रु डुङ्गामा सवार हुनुले बारम्बार दुर्घटनाका कारण बन्ने गरेका छन् । सिन्ह्वा
वि.सं.२०७३ कात्तिक ५ शुक्रवार ०३:५५ मा प्रकाशित
