हामी सबैकाे संसारन्यूज

उच्च ठाउँ भएकाले र हिमपातका कारण धेरै हिउँ थुप्रिएला कि भन्ने डर भएपनि आफूले सुरक्षाका लागि खटेका सबैलाई शान्त भएर बस्न तथा नआत्तिन आग्रह गरेको प्रनाउ थापाले सुनाए ।

१७ फागुन, काठमाडौँ । बस्ने ठाउँसमेत नभएको निकै अप्ठ्यारो भीरमा सुत्न त म्भव नै थिएन । रात भर जागा बस्यौँ, ताप्लेजुङका प्रहरी प्रमुख(प्रहरी नायब उपरीक्षक) सञ्जयसिंह थापाले सुनाए ।

पाथीभरा क्षेत्रमा हेलिकप्टर दुर्घटना भएपछि निधन भएकाहरुको शव रुँघ्न घटनास्थलमै बस्दाको क्षणबारे सुनाउँदै उनले हिउँ सहेर बडो कष्टका साथ रात कटाएको स्मरण गरे ।

बुधबार दिउँसो करिब १ जे संस्कृत, पर्यटन तथा नागरिक उड्डयानमन्त्री रविन्द्र अधिकारीसहित सात जनाको टोली पाथीभराको दर्शन गरे फर्कने क्रममा डाइनेटी एयरको हेलिकप्टर सिस्नेभीरमा दुर्घटनाग्रस्त भएको थियो । दुर्घटनास्थल पुग्न निकै अप्ठ्यारो र करिब तीन हजार मिटरको उचाइमा रहेका कारण दुर्घटनामा निधन भएका सबै शब बुधबार ल्याउन सम्भव भएन । साँझसम्म चारवटा शब सुकेटार विमानस्थलसम्म ल्याए पनि अँध्यारो र हिमपातका कारण बाँकी तीन जनाको शब उठाउन सम्भव हुन सकेको थिएन ।

तीन जनाको शब घटनास्थलबाट ल्याउन सम्भव नभएपछि प्रनाउ थापाको नेतृत्वमा सशस्त्र प्रहरी बल, नेपाली सेनासमेत गरी करिब ४८ जनाको टोली दुर्घटनास्थलकै जंगलमा बसेको थियो । ठाउँ अभावले शव रुँघ्न बसेको टोलीका सदस्य छुट्टछुट्टै बसेको उनले बताए । टोलसँग एउटा मात्रै पाल भएकाले सबैजना खुला आकाशमुनी बस्नु परेको थियो ।

नजिकैको फेदीबजारका बासिन्दाले ल्याइदिएका एक/एक पुरिया चाउचाउ, बिस्कुट तथा पानी पिएर सुरक्षाकर्मीले रात बिताएका थिए । जंगलमा सुकेका दाउरा फेरा परेसम्म संकलन गरी आगो बालिएको थियो ।

हिमपातका कारण चिसोले हात कठ्याङ्ग्रिएपछि ढुङ्गा वा बुट्यानको आड लिएर बस्न पनि निकै हम्मे भएको हेलिकप्टर दुर्घटनाको उद्धारका लागि काठमाडौँबाट आएका नेपाली सेनाका सीएआरटी टिमका सेनानी चिरञ्जीवी चौलागाईले अनुभव सुनाए । ‘धेरैलाई निद्रा कतिखेर पुग्छ भन्ने हुन्छ । हामीलाई निद्राको वास्ता थिएन । न भोक, न त प्यास, उज्यालो कतिखेर खेला र घटनास्थलमा रहेका बाँकी शव सुकेटारसम्म पु¥याउन सकिएला भन्ने चिन्ता रहिरह्यो’, उनले भने । उच्च ठाउँ भएकाले र हिमपातका कारण धेरै हिउँ थुप्रिएला कि भन्ने डर भएपनि आफूले सुरक्षाका लागि खटेका सबैलाई शान्त भएर बस्न तथा नआत्तिन आग्रह गरेको प्रनाउ थापाले सुनाए ।
स्रोत : आजको गोरखापत्र दैनिकबाट