हामी सबैकाे संसारन्यूज

१९ फागुन, बेइजिङ, चीन । अनलाइनबाट सङ्गीत सुन्ने चिनियाँको सङ्ख्या सन् २०१८ को अन्त्यसम्ममा ५७ करोड ६० लाख पुगेको चीनको इन्टरनेट विकाससम्बन्धी शनिबार सार्वजनिक एक तथ्याङ्कमा उल्लेख गरिएको छ ।

चीनमा अनलाइनमार्फत दर्ता भएको जनसङ्ख्याको ६९.५ प्रतिशत जनताले सङ्गीतका लागि अनलाइनमा निर्भर हुन थालेको तथ्याङ्कले बताएको छ । तथ्याङ्क अनुसार झण्डै ५५ करोड ३० लाख मानिसले सङ्गीतका लागि मोबाइलको प्रयोग गरेको पाइएको छ । यो अघिल्लो वर्षको तुलनामा आठ प्रतिशत वृद्धि हो ।

चीनको अनलाइन म्यूजिक बजारका कारण सङ्गीतलाई वैधानिक तरिकाले सुन्न सकिएको र यसबाट सङ्गीतकार, सर्जक तथा गायकको कपिराइट्स अधिकारलाई कार्यान्वयनमा लान सहज बनेको अनलाइन म्युजिक विकासका लागि काम गर्दै संस्थाले जनाएको छ । अनलाइनबाट म्युजिक सुन्दा घरेलु नेटइज क्लाउड म्युजिक र टेन्सेन्ट म्युजिकजस्ता कम्पनीले पनि प्लेटफर्म पाएको बताइएको छ ।

अन्तर्राष्ट्रिय फोनोग्राफिक इन्डस्ट्री फेडेरेशनलाई उद्धृत गर्दै प्रतिवेदनमा भनिएको छ, “९६ प्रतिशत चिनियाँ सङ्गीत प्रयोगकर्ताले वैधानिकरूपमा सङ्गीत सुन्ने गरेको छ जबकी विश्वमा औसत ६२ प्रतिशत सङ्गीत पारखीले मात्र कानूनसम्मत हिसाबले सङ्गीत सुन्ने गरेका छन् ।”