विजय थापा, अमेरिका । अमेरिकामा गत हप्ता कार दुर्घटनामा परी निधन भएका चार नेपालीहरूको शुक्रबार जर्जिया राज्यको डेकाटोर सहरमा हिन्दु परम्परा अनुसार दाह संस्कार गरिएको छ ।
एस टर्नेर एन्ड सन्स, डेकाटोरमा आयोजित अन्त्येष्टि कार्यक्रममा मृतक चिरन्जीवी खनाल, श्यामा खनाल र रिचा पन्त खनालको शवमा जेष्ठ सुपुत्र समिर खनालले दाग वत्ती दिएका दिएर अन्तेष्टि कार्य पूरा गरिएको हो ।
त्यस्तै उक्त दुर्घटनामा निधन भएकी प्रतिमा सुवेदीलाई दाजु प्रतीक सुवेदीले दाग वत्ति दिएको जानकारी भर्जिनियाका उनका नातेदार तथा समाजसेवी सुनिल मणि दाहालले जर्जिया बाट बताए ।
खनाल परिवारका कान्छा छोरा सुवास खनालको स्वास्थ्य स्थिति सुधारोन्मुख रहेको र उनी उपचारका क्रममा अगस्ता अस्पतालमा रहेको पारिवारिक सुत्रले वतायो । अन्त्येष्टि कार्यक्रममा खनाल तथा सुवेदी परिवारका आफन्तहरूले निधन भएकाहरूका वारेमा स्मरणका आफ्ना भनाईहरू प्रस्तुत गरे ।
अन्त्येष्टि कार्यक्रममा सहभागिता जनाई श्रद्धान्जली दिन जर्जिया, भर्जिनिया, सिकागो, क्यालीफोर्नीया ,टेक्सास लगायत अन्य राज्यहरूवाट आफन्तजन र साथीभाईहरूको उल्लेखनीय उपस्थिति थियो ।
यस दुखद घडिमा निधन भएकाहरू प्रति हार्दिक समवेदना दिदै घाईते समिर खनाल र सुवास खनालको शीघ्र लाभको कामना समेत गरिएको थियो । त्यस्तै यस विपत्तीमा भोक प्यास नभनी खटने जर्जिया विश्व बिद्यालय स्थित नेपाली विद्यार्थी समूह तथा सहयोग र सहानुभूति दर्शाउनु हुने सम्पूर्ण नेपाली समुदायहरूलाई धन्यवाद ज्ञापन गरिएको छ ।
तस्बिर : सुनिलमणि दाहाल
