३१ बैशाख, काठमाण्डौं । बचत कर्ताको २४ करोड भन्दा बढी रकम कुम्ल्याएर बुढानीलकण्ठको नयाँ सन्देश बचत तथा ऋण सहकारी लिमिटेडका मुख्य सञ्चालक फरार भएका छन् ।
साढे २१ प्रतिशत ब्याज पाइने प्रलोभन देखाएर सहकारीले सय दिने मुद्दति योजना ल्याएपछि बुढानीलकण्ठ नगरपालिका वडा नं ३ र ५ लगायतका वडाका बासिन्दाले करोडौं रुपैयाँ निक्षेप गरेका थिए । पीडितहरुका अनुसार कम्तीमा २ हजार जनाको रकम फसेको छ ।
सहकारी सञ्चालकले व्याज त परै जावोस् साँवासमेत फिर्ता दिन आलटाल गरेपछि निक्षेपकर्ताहरुको रकम फिर्ताका लागि दौडधुपमा थिए । गत पुस १५ मा वडा नम्बर ५ का अध्यक्ष विजयकुमार तामाङ, सहकारीका अध्यक्ष सानु ठकुरी, उपाध्यक्ष राजकुमार ठकुरी र पीडितबीच बुढानिलकण्ठस्थित प्रहरी इकाइमा छलफल समेत भएको थियो ।
वडा अध्यक्ष तामाङका अनुसार उक्त छलफलमा सहकारीले ४५ दिनभित्र कागजी निक्षेपकर्ताको रकम फिर्ता गर्ने सम्झौता गरेको थियो । कागजी भाका सकिएपछि पनि सहकारी सञ्चालकहरु सम्पर्कमा नआएपछि पीडितहरुले सोमबार नेपाल प्रहरीको केन्द्य्रीय अनुसन्धान व्युरोमा जाहेरी दिएका छन् । मंगलबारको कान्तिपुर दैनिकबाट
वि.सं.२०७६ वैशाख ३१ मंगलवार ०८:०४ मा प्रकाशित
