२८ कात्तिक, म्याड्रिड (स्पेन) । स्पेनका प्रधानमन्त्री मारिआनो रजोएले आफ्नो सरकारले युरोपियन युनियनसँगको घाटा बजेटलाई व्यवस्थापन गर्नेगरी ल्याउन लाएको ‘लिनर बजेट’ मा सरकारलाई सहयोग गर्न प्रतिपक्षीदलसँग आग्रह गरेको छ ।
प्रधानमन्त्री रजोएको दलसँग वर्तमान सत्ता समीकरणमा कानुन परिवर्तन गर्नका लागि चाहिने बहुमत संसद् सदस्य नहुँदा ‘लिनर बजेट’ ल्याउन प्रतिपक्षको सहयोगको याचना गरिएको छ ।
प्रधानमन्त्री रजोएले सरकार बाहिर रहे पनि आफ्नो दलसँग निकटता राख्ने दलका नेताहरूसँग कुरा अघि बढाएको र देशको अर्थव्यवस्थापनमा देखिएको सङ्कट समाधान गर्दै राजनीतिक स्थिरताको लक्ष्य प्राप्त गर्ने आफ्नो उद्देश्य रहने बताउनुभयो ।
स्पेनको सन् २०१६ मा जारी गरिने बजेटले ५.५ अर्बको राजस्व वृद्धिका लागि इयु अधिकारीसँग सहमति जनाएअनुसार बजेटको व्यवस्था गर्नुपर्ने हुन्छ ।
स्पेनमा दुई पटकसम्म भएको निर्वाचनले कुनै पनि दललाई स्पष्ट बहुमत नदिएको अवस्थामा १० महिना लामो राजनीतिक सङ्कटलाई अन्त्य गर्न कन्जर्भभेटिव पार्टीलाई यहाँका दलले जिम्मेवारी सुम्पिएका छन् ।
रजोएले राजनीतिक सङ्कट समाधान गर्ने सर्तमा दोस्रो पटक उहाँलाई प्रधानमन्त्री बन्न संसद्ले विश्वासको मत प्रदान गरेको छ । एपी
वि.सं.२०७३ कात्तिक २८ आइतवार ०३:३१ मा प्रकाशित
