हामी सबैकाे संसारन्यूज

२४ मंसिर, बेल्जियम ।   बेल्जियमस्थित नेपाली दूतावासका राजदूत लोक बहादुर थापाले नेपाली दूतावासमार्फत नेपाल सरकार प्रधानमन्त्रीलाई बुझाउन नमानेको भन्दै आपत्ति जनाइएको छ ।

बेल्जियममा केही समय अगाडि नेपालीहरुले भारतीय दूतावास अगाडि गएर सीमा अतिक्रमणको विरोध गरे । विभिन्न नाराहरूद्वारा उनीहरुले विरोध प्रदर्शन गरेका थिए । विरोध कार्यक्रमको मुख्य आयोजक विप्लव निकट मानिएको नेपाली जनप्रगतिशील मोर्चा बेल्जियम रहेको थियो । तर, अहिले यही मोर्चा लगायत वैचारिक संघ संस्थाले नेपाली दूतावासमार्फत नेपाल सरकार प्रधानमन्त्रीलाई ज्ञापनपत्र बुझाउन जाँदा राजदूतले ज्ञापनपत्र बुझ्न नमानेको आरोप छ ।

मोर्चाले राजदूत लोक बहादुर थापालाई सोमवार नेपाली दूतावास ब्रसेल्समा ज्ञापनपत्र बुझाउने समय निर्धारण गरेको थियो । समय बिहान ११ बजेको दिइएको थियो । यो समय राजदूत आफैले मोर्चाका कार्यकर्ताहरुलाई दिएका थिए । जसमा बेल्जियमस्थित विभिन्न वैचारिक संघसंस्थाका प्रतिनिधि उपस्थित हुने निश्चित भएको थियो । तर, अचानक राजदूत थापाले उक्त ज्ञापनपत्र नलिने तर छलफल गर्न सकिने भनेर सूचना दिए । त्यसपछि समस्या सुरु भएको थियो ।

राजदूत थापाको यो कार्यप्रति मोर्चाले प्रेस विज्ञप्ति जारी गरेर घोर भत्र्सना गरेको छ । प्रेस विज्ञप्ति मार्फत मोर्चाले आफूहरु सबै स्तब्ध बनेको जनाएको छ ।

‘नेपाल सरकारको र मातहतको यो कुटनैतिक नियोगको यो अलोकतान्त्रिक तथा गैरजिम्मेवारी कार्यको हामी घोर भत्र्सना गर्दछौं,’ विज्ञप्तिमा अगाडि भनिएको छ ‘राजदूत लोक बहादुर थापाले आफ्नो गैरजिम्मेवारीपूर्ण कार्यशैली सच्याउन आग्रह गर्दछौ ।’

राजदूत थापाको यो कार्यको विरोधमा बेल्जियममा रहेका अन्य वैचारिक संघसंस्थाहरुले पनि विरोध विज्ञप्ति निकाल्ने तयारी गरेको जनाएका छन् । उनिहरुले राजदूत थापाको यो शैलीले राष्ट्रियता माथि धक्का पुग्ने काम गरेको पनि बताएका छन् । यो कार्यको सामाजिक सञ्जालमा समेत विरोध गरिएको छ ।