Sansar News
गाउँमा अचानक बाढी पस्यो । धेरै घर परिवार क्षत बिक्षत भए । म पनि आफ्नो शरिर जोगाउन सुरक्षित स्थान खोज्दै भागेँ । जता हेर्यो उतै जलमग्न । मैले भागिरहनु उचित सम्झिएँ र भागी रहेँ । अब जङल को छेउँ पुगेकी थिएँ, जङल भित्र पस्नु अझ बुद्धिमानी होला जस्तो मानिन र त्यही एउटा अलि ठुलो रुखमा सहारा लिएँ । समुद्र जस्तै टाढा–टाढासम्म पानी मात्र थियो । घरी–घरी बाढीसगै बगाएर ल्याएका समान देखिन्थे । जनावरहरु पनि बग्दै रहेका देखिन्थे । तर, आफ्नो ज्यान छोडेर जनावरको ज्यान जोगाउन भने आँट आएन । तर केहि बेरमा मैले देखेँ दुइ जना साना–साना बालकका टाउकोहरु घरी पानीमा डुब्दै घरी निस्किदै गरेका । मेरो मन थाम्न सकिन र मैले आफ्नो सारी खोलेर एक छेउ रुखको हाँगामा बाँधे अर्को छेउ आफ्नो कम्मरमा बाँधे र हिम्मत गरेर रुखबाट तल झरेँ मैले ति दुबै बालकलाई समात्न सफल भएँ ।
मलाई थाहा थिएन ति दुबै जिउँदा छन कि छैनन । फेरि पनि मैले आफ्नो शरिरमा टाँसेर उनिहरुको चिसो शरिरलाई तताउन प्रयास गरेँ । यसै पनि मेरो स्वयम शरिर तातो भने थिएन ।
तीन दिनमा बाढीले आफ्नो उग्र रुप छोडेर अलि साम्य भयो । अब रुखबाट झर्नु सुरक्षित देखिएको थियो ।
दुबै बालकलाई लिएर म सरासर स्वास्थ्य चौकी लागे । ति दुबै बालक जिवित छन–छैनन निक्र्यौल गर्न । त्यतिबेला म असाध्यै खुशी भएं र भगवानलाई धन्यवाद दिएँ जती बेला स्वास्थ्यकर्मीले दुबै बालक जिवित रहेको जानकारी दिए ।
भर्खरै लुटिएको मेरो कोखले पुनर्जीवन पाएको महसुस गरेँ । तिनै बालकहरुमा आफ्नो ममता निरन्तर भरी रहेँ ।
समय बित्यो त्यो कथा धेरैले बिर्सिदै गए । मैले पनि मेरा कोखका सन्तान नै हुन् भनि यो कथालाई लुकाउन सफल भएँं ।
आज दुबै सन्तान लिएर म नयाँ बस्ती पुगेकी थिएँ जहाँ शरणार्थी अनाथ बालकहरु थिए । मलाई त्यतिबेला अझ गर्ब लाग््यो, जतिबेला मेरा साना–साना १० बर्ष नपुगेका बालकहरुले ति अनाथ बालकहरुप्रति मेरो जस्तै दया र प्रेम देखाए । उनिहरुले भने, ‘आमा इनिहरुलाई हाम्रो घर लइ जाउ एकलइ छोड्नु हुँदैन रुन्छन । बिरामी भए भने कसले हेर्छ ? खाना कसले दिन्छ ?’ आदी–आदी मेरो आँखा रसायो । आखिर मैले थोरै समय हो आफ्नो स्तनपान गराएको । केहि कर्म संस्कार सिकाएको यसरि रगतकै गुण जतिकै दुबै बालक आज मेरो सम्पूर्ण गुण लिएर आमाको चिनारी दिदै छन् ।
गाउँमा अनि देशमा आमाको ममताको पूर्ण परिभाषा दिएका छन् । के हरेक बालकमा यस्तो गुण रहन सक्छ कर्म मात्र दिदा ?
वि.सं.२०७६ मंसिर २८ शनिवार ०९:५७ मा प्रकाशित
